1693/2022-2023
Aizawl, the 24th August, 2022 : Vawiin khan Sports & Youth Services Minister Pu Robert Romawia Royte chu MZP General Headquarters, Aizawl buatsaih 'Thu leh Hla Kutpui-22' hun thumna-ah khuallian a ni a, Vanapa Hall-ah hun a hmanpui.

Minister Pu Robert Romawia Royte chuan sawm bik te zingah a tel chu lawmawm a ti a, thu leh hla hi ram venhimna hmanrua a ni mailo a, ram zau tak awp theihna a ni, a ti a. Khawvelah hnam ropui tak tak kan ti ho en in, thuziak uar hnam an ni zel a, thuziak tha chuan khawvel history thlir letna kawngah tangkaina tam tak neiin, thu leh hla lama harhtharna hian ram hmasawnna leh ram ropuina a ti pung thei a ni a ti a. Khuallian chuan mizo ten thu ziak leh chhiar uar thar leh ila, internet khawvel ah cheng hnem lo in, nitin a kan hun hman dan te ziak thla peih thar a, Diary vawn te pawh uar a pawimawh a tih thu he hunah hian a sawiin, chuchuan kan hun hmandan thlirletna kawngah leh mimalin-a hmasawnna kan zawh naah kawng tam takin min pui thei ang a ti a. Thu leh hla tha hian hnam kawngbo tur min hruai tha thei a, kan ngaihtuahna leh kan thiamna ti pung zual zel tu hmanrua a nih bakah hriatna dik neihnan a tangkai em em a ni a ti a. Minister chuan lehkhabu chhiar kan uar zual a tul zia sawiin, kan thil hriat dik leh diklo thlitfim na a tan hmanrua pawimawi ber pakhat a ni a ti a. Kan thluak a lo lut information tam tak te ni min ti chhe tu a ni thei a, ngaihdan diklo min pe tu, thuthlukna diklo min siam tir theitu a nih avangin lehkhabu chhiar uar zel turin kalkhawmte a fuihin a ngen a ni.

He hunah hian ziakmi hrang hrang- Pi B. Vanlalzari, Pu C.Lalnunchanga, Prof. RL Thanmawia, Pu B.Lalthangliana te kawmna hun neih a ni a, he kutpui ah hian Kum 1989 atanga kum 2021 inkara MAL book of the year dawngtawhte chawimawina hun an nei bawk a ni.

Attachment

  • Loading attachment...