1694/2022-2023
Khawzawl the 24th August, 2022: Mizoram Sawkar Flagship Programme - Socio-Economic Development Policy (SEDP) hnuaia Khawzawl District chhunga kalpui tur, eizawnna ngelnghet leh hmasawnna siam tura chhungkaw tinzawna duan Family Oriented SEDP chu vawiin chawhma dar 11 khan I&PR, Rural Development leh Revenue Department changtu Minister Pu Lalruatkima chuan Khawzawl Zaingen Branch YMA Hall-ah a hawng. Minister tawiawmtu Pu L.Thangmawia, MLA, Vice-Chairman, Human Resource Development Board chu he hunah hian khualzahawm a ni.

Khuallian Pu Lalruatkima chuan mipuite tel lova Sawrkar a kal theih loh thu leh policy reng reng mipuite tawiawmna tel lova a hlawhtlin theih loh thu sawiin, an tana duan Sawrkar flagship programme Socio-Economic Development Policy hlawhtlin theih nan mipuite tawiawmna a ngen a. SEDP inkaihhruaina duan anga kal chhoh zel tum a nih thu sawiin, hamthatna dawngtute chu tanpuina sum leh pai an dawnte tangkai taka hmanga, rinawmna leh taimakna nena thawka a tipungtu nih tum turin a chah a. SEDP bultanna chu bei tham angin lang mahse a dawngte chhawmchhoh mai bakah hmalakna thar neih zel tum a ni tiin, Family Oriented SEDP chu chhungkaw khaichhuahna tur leh an intodelh theihna tur mai bakah khawtlanga hmasawnna ruhrel siamna tur pawimawh tak a ni, a ti bawk.

Rural Development Minister chuan kuthnathawktute thlai thar zawrh, sawngbawlna leh vawnthatna tur Rurban Commercial Centre (Agro Processing Centre & Warehouse) Chawngtlai leh Puilo khuaahte siam mek a nih thu sawiin, kumin chhunga hawn hman beisei a ni, a ti a. District Panchayat/DRDA Office Building leh Panchayat Bhavan cum Project Director's quarter-te sak mek a nih thu pawh a sawi a. PMAY Housing for All Grameen kaltlangin in sak tanpuina cheng vaibelchhe 41 pekchhuah tan mek a ni, a ti a. Sawrkarin Khawzawl District tan DIPRO post siam phalna a tihchhuah tawh thu a sawi a. In leh lo tehfel a niha Sawrkarah dan anga chhiah a luh zel theih nan Khawzawlah Surveyor dah thuai a nih tur thu te, SEDP kaltlangin in leh lo tehfel nan cheng nuai 90 pek belh a nih thu leh SO quater sak mek a nih thu te, kawng laih mek avanga zangnadawmna pek chungchangah sawrkarin mipuite chanvo leh dikna humhalh chungin dan tlawhchhana hma a lak zel thu Revenue Minister chuan a sawi bawk.

Khawzawl District-in infiamna leh thei leh thlai dehchhuah kawnga nasa taka hma a sawn thu leh faina kawnga entawntlak tak a ni chu fakawm a tih thu sawiin, hmasawnna ruhrel dang dangte karah faina ngaipawimawh zel turin a chah a. Damdawi hmang lova thlai thar chhuahte khawvelin a dahsan avangin Pathianin ram tha tak min pekah hian kuthnathawktuten an thawh hlawh an hmuha an hlawkpui theih nan theihtawp chhuah zel tum a ni, a ti a. Sawrkar hmalakna hrang hrang tihhlawhtlin a nih dan leh hun harsa tam tak paltlang a nih tawh dante tarlangin, hun khirh tak tawh kara Pathian hruainaah lawmthu a sawi a. Khawzawl District-a hlawhtling taka Family Oriented SEDP kalpui a nih theih nana duhsakna hlanin Family Oriented SEDP - Khawzawl District chu a hawng a ni.

Khualzahawm Human Resource Development Board Vice Chairman Pu L.Thangmawia chuan Khawzawl District thar hawn a ni leh mumal taka Sawrkar Department hrang hrangte kalpui a ni chu a lawmpui thu sawiin, Khawzawl District chu ram leh hnam tana theihtawp chhuah thintute lo chhuahna a ni, a ti a. SEDP chu huapzau zawka ei leh bar zawnna leh intodelhna tura duan a nih thu sawiin, bultan nan chhungkaw tinzawn Family Oriented SEDP kalpui a ni, a ti a. Human Resource Development Board kaltlanga SEDP hmalaknate a tarlang a. Covid-19 hrileng karah Sawrkarin theihtawp chhuaha hma a lak thin thu leh, mipuite nitin mamawh chhawpchhuah kawngah theihtawp a chhuah thu a tarlang a, hrileng vanga sum hmuh tur ang hmu lova harsatna tawh mek karah Sawrkar Flagship Programme SEDP theih ang anga bultan a ni, a ti a. Mipuite chu bultanna tlawmte mah nise thahnemngai taka hma la turin a chah a. Tun mai nilo hmalam hun thlir chungin dinhmun ziaawm hunah lian tham zawka hmalak zel tum a ni, a ti bawk.

He hun hi Khawzawl District Bawrhsap Pu C.C. Lalchhuangkima, District Level SEDP Committee Chairman chuan kaihruaiin kalkhawmte lawmna thu a sawi a. Pu Lalvenhima, Member Secretary & Project Director, DRDA Khawzawl hnen atangin SEDP kalphung, inkaihhruaina leh dinhmun tlangpuite ngaihthlak a ni a. Pu Lalfakzuala Chenkual, Councillor, AMC Ward No-XIII in thu a sawi bawk a. Village Level SEDP Committee leh Line Department hrang hrang atanga beneficiary thlante kutah cheque hlan a ni a. Pu C.Kera, Member, District Level SEDP Committee-in lawmthu sawiin hun a khar a ni.

Family Oriented SEDP hi August ni 19, 2022 khan Mizoram puma hman turin Chief Minister Pu Zoramthanga, SEDP Governing Board Chairman ni bawk chuan a hawng a. Hemi hnu hian District hrang hrangah kalpui chhoh tan mek zel a ni a. Khawzawl District chhung Tuichang AC ah hian Commerce & Industries, Agriculture, UD&PA, Horticulture, Sericulture, Animal Husbandry & Veterinary leh Fisheries Department atangin Family Oriented SEDP dawng tur chhungkua 1500 te thlan an ni.

Pu Lalruatkima hian tukin khan MGNREGS leh MLA Fund tangkawp hmanga sak mek, District Panchayat/DRDA Office Building leh Panchayat Bhavan cum Project Director's quarter-te, District Administration Fund kaltlanga Settlement Officer (SO) quarter sak mekte bakah I&PR Office sakna tur hmunhmate a enfiah a. DC Office sak mek pawh a tlawh a. Family Oriented SEDP hawn a nih hnu hian chawhnu lamah Rurban Commercial Centre, Puilo a mi a tlawh nghal bawk a ni.