Vawiin khan Mizo painter lar Pu Laltanpuia leh R. Lalruatkima te Duet Painting Exhibition 2017 chu Aizawl Art Gallery, MUP building-ah tan a ni a. Pi Laldikkimi, Director, Social Welfare Department chuan a hawng a ni.

Exhibition hawngtu Pi Laldikkimi chuan, Painting hi amah ngei pawh a lo tui thinna a nih thu leh khawvel hmun hrang hrangah pawh Art Gallery a tlawh thin thu a sawi a. Aizawlah hian Art Gallery tha tak nei ve thei ila chuan kan painting te hi tun aiin a lang mawi lehzual ang a, hralh pawh an tla sawt ang tiin a rualawh thu a sawi a ni.

Pi Lallianpuii, Joint Director, I &PR pawhin thu a sawi a. Pu HK Jerry Ramliana, President, Mizoram Art Development Society (MADS) in hawnna inkhawm hi a kaihruai a ni.

Duet Painting Exhibition hi Mizoram sorkar I & PR Department bultuma neih a ni a. Heta painting phochhuah te hi a mawi hlawm hle a, man tlawm thei ang ber tura hralh tur a ni. Duet Painting Exhibition hian 15.12.2017 thleng a awh dawn a, a duh apiang tan tlawh theih a ni a. Painting 50 tarchhuah a ni a, en man leh luh man a awm lo a ni.