Mizoram PWD chuan thuchhuah siamin December 8, 2017 khan Chanchinbu thenkhatah mi thahnemngai pawl thenkhat ten Zemabwk - Tuirial kawng siam mek endika, a nihdan a siam a nih loh vanga hlep tam hle dawn nia an hriat thu a chhuak nual a. Heng bakah hian social meida lamah pawh tarlan a ni nual bawk a. Henga thu ziaktute hian hna thawh dan tura ruahman (Specification) an hriat chian loh vang a niin, alkatra chhah lam pawh a nihdan tur dik tak a thawh a ni zawk e.
He hna hi kawng thar ang hrima a hnuai lam atanga phah that vek tur ni lovin, hunbi neia thuam that leh hna (Periodical Renewal programme) chauh a nih avangin, a khuar chhe lai hnawh phui a, blacktop a thuam that leh hi kawng neitu Ministry of Road Transport & Highways (MoRT&H) lam sanction dan pawh a ni.
He hna atana sanction zat Rs.1966.39 lakhs-ah hian Contract Agreement chu Rs. 1791.77 lakhs a ni thung. Chuvangin sanction amount zawng zawng Contractor hnena pek vek tur anga chhut hi a dik lo a ni. Khawchhung kawng zau zawng pawh 7metres tura estimate a ni nain a thenah chuan 9 metres atanga 11 metres lai pawh niin, hmun tlemteah 7 metres tlinglo pawh a awm ve bawk.
He hna atana tender tihfel hnuah Zemabawk dai atanga Tuirial lam Tuipang thlengin NHIDCL-in Double lane-a lai turin tender a chhuah tawh tih hriat avangin hnathawh dan tur tih danglam hret a ni a. A pawimawh zual laiah chauh Bituminous Macadam (BM) 50mm (inches 2) a chhah phah tura ruahman chu Thuampui leh Zemabawk khaw chhungah a tluana phah zawka, achungah Bituminous Concrete (BC) 30mm-a chhah a thuah leh vek turin ruahman ani ta zawk a; nakkum lawka laih chhiat leh tur lamah chuan BC 30mm a chhah chauh phah ani thung ang.
A hmuna lo enfiah ve tuten alkatra phah (BM) chhah zawng inches 3 tur emaw an tih hi an hriatsual vang a ni a; an teh dan inches 2 a chhah an tih hi a nih dan tur dik tak zawk a ni. An va endik ni khan a hnuai zawk BM phah chungah BC 30mm a chhah kawng chanve chauhva phah hrih anih avangin a chhah hlei/a ko hlei niin an hmu niin a lang a, hei hi chu kawng chanve dang phah leh hunah a rual mai dawn a. Bituminous Macadam thlur hnih inzawmna lai tlema ruallo lai chu a awm ngei a; hei pawh hi BC phah hunah hrut mam mai tur a ni.
Road Roller-in a chil hneh loh vang leh chawhpawlh that loh vang nia an ngaih khawk leh engemawzat an hmuh hi a dik a. Chawhpawlhsa phurtu motor-in electric ban a sut avanga chesawn thei lova rei tak a din avangin alkatra a lo dai hman a. Chumi phahna lai chu a lo pawrin a khawk ta vak mai a; hei hi chu siamthat leh tawh a ni. Khaw hmawr lam Petrol Pump bul velah a hnukhawia phah, a thenlai kawng lo hnawng avanga phuailuai deuh chu a awm ngei a. Helai hi chu a bialtuten an hre sa a, siamthat tura ruahman a ni bawk. Tin, rawra hman mek hi Contractor thar hian Silchar atanga a rawn phur chhoh vek a nih avangin kan ram lung ai chuan a tha deuh tura ngaih a ni bawk.
Mipuiten kawng tha kan neih loh hlauva hna an lo thlir ve reng leh thalo an hriat lai Department hotute an hrilh thin hi a lawmawm hle a; contractor hna thalo tur kan ventlan pawh a pawimawh hle a. Chutihlai erawh chuan, hna thawhdan tur thawktute zawt chiang hmasa lova thu diklo T.V leh chanchinbu lama tarlan chiam erawh chu, thahnemngaia siamthat duhna rilru aiin tihmualpho tumna a an theih avangin, hrechiang duh chuan PWD lama mawhphurtu zawt chiang hmasa thin turin kan ngen a. Thil tha tur zawk nia kan hriat rawtna reng reng chu kan dawng sawng thei reng a ni.
