No.5562/2020-2021

BRTF Road Dungtlang atanga Samthang leh Vaphai tan tlanga Farkawn panna kawngpui siam that anih theihna tur chungchang relin vawiin khan Champhai Bawrhsap Pi Maria C.T Zuali hovin Tuipuiral Zirlai In Dungtlangah inrawnkhawmna hun neih a ni.

He hunah hian Pi Maria C.T Zuali chuan Champhai district ah kawngpui tha leh felfai nei tura tanlak zel anih thu sawiin, Dungtlang atanga Farkawn panna kawng siam that thuai anih theihna tura inrawnkhawmna buatsaih anih thu a sawi a. Khawtlang hruaitu kalkhawmte chu kawngpuite enkawl uluk tur leh khaw fai tak siam tuma tan la sauh sauh turin a chah a. Village Council thlan tharte chu Bawrhsap aiawha mahni khua theuhah dan leh dunte ngaipawimawha ro rel thiam turin a chah bawk.

Champhai District Bawrhsap chuan sum in a lei sen loh leilung hausaknate ngaihlua vawnghim turin khaw mipuite an pawimawh thu sawiin, tuihna siamtu pawimawh tak ramngaw tichereu mai lova venghim tlat tum turin a fuih a, nungcha leh ramngaw humhalh kawngah tan la a khualzin hip thei tura tan la zel turin a chah nghal bawk a ni.

Pu Lalduhthlana DFO Champhai chuan Dungtlang to Farkawn kawng siam tur avanga ramngaw tih chhiat tur chhut chhuah hu Hecatare 57 a zau Farkawn Site Allotment Board in Compensatory Afforestation (CA) atan an ramchhung Sihdarh ramah an pek thu a sawi a, CA atan ram bua, ramngaw a siam tur an duh thin thu a sawi bawk. Hmasawnna kentel thilte siam kawngah ramngaw tihchhiat angaih chang a awm thin a, forest leh environment clearance neih hmasak a tul thu sawiin, Forest Conservation Act leh Environmental Protection Act hmanga dil thin anih thu a sawi bawk.

Thukhawm chuan Farkawn huamchhung Sihdarh rama Compensatory Afforestation (CA) tura Farkawn Site Allotment Board in a pek ram hectare 57 zau chu a hmun ngeiah DFO hova endik ni se a ti a, meeting zawh hnu hian enfiah turte an kal nghal a ni. CA dan ang a phak anih chuan Reserved Forest Area ah puan tur niin Forest dept kutah a enkawl zui hna a awm dawn a ni.

He hunah hian Pu Lalduhthlana DFO Champhai, Pu Vanlalchhuanliana SO, Dr. Lallawmkima DIPRO, Pu R.Lalruatfela ACF bakah Dungtlang to Farkawn BRTF Road paltlang khaw hrang hrang VC leh YMA hotute an tel a ni.