Vawiin khan Art & Culture Minister Pu R. Romawia chuan Durtlang North Branch YMA Library building, cheng nuai 6 senga sak thar chu a hawng. He library hi Raja Rammohan Roy Library Foundation (RRRLF) leh Art & Culture Department atanga fund dawn hmanga sak a ni.

Minister leh bialtu MLA ni bawk Pu R. Romawia chuan Library building tha tak Durtlang North Branch YMA in an sa thei chu lawmawm a tih thu sawiin, tangkai taka hmang chhunzawm zel turin leh felfai taka luah turin a chah a. Lehkhabu chhiar taima mi chu mi remhria leh rawntlak an ni thin tiin, library chu veng chhung mi tam zawkin an hman a, finna tam tak an chawh chhuah phah a beisei thu a sawi a ni. Minister chuan State Library hnathawh chungchang sawikaiin, Zoram chhunga library hrang hrangte tih changtlun kawnga an hmalakna te fakin, heng hmalakna te hi a thlawn mai loh a, Mizote hi lehkhachhiar taima hnam kan lo nih zel a beisei thu a sawi bawk.

He huna thusawi dang Pu Lalramliana, Mizoram Library Association President chuan RRRLF hnathawh dan te tarlangin, he Foundation hian sum an pekchhuah turah a duh khirh hle a. A bultum library-te hman tangkai an nih leh nih loh enfiaha an kal thin thu te a sawi a. Hemi avang hian hmasawn zel duh chuan library service tha neih a tul a ni a ti a. Chumi tehna sang ber chu library-a hriatna tam tak awm te hi hman tangkai a nih leh nih loh hi a ni tiin, vawiina library hawn thar pawhin service tha tak a neih a beisei thu a sawi a ni.

Library building sak thar hi chhawng hnih niin, a chung hi feet 300 bial a zau a ni a, a hnuai zawk hi feet 200 bial a zau a ni. A sak nan hian RRRLF atanga Fund hmuh bakah Branch sum cheng sing 4.9 an hmang tel bawk a. December ni 16, 2013 khan sak zawh niin, tunah hian lehkhabu 4,418 a awm a ni.

Library hawnna inkhawm hi Pu K. Lalremsanga, Durtlang North Branch YMA President-in a kaihruai a. He hun hi AMC Councillor Pu Lalrinenga Sailo leh Art & Culture Joint Director Pu R. Hmingthanzuala ten an hmanpui bawk a ni.