November ni 23, 2013 a Tripura hel NLFT leh Tuikuk hel BNDLFM inti ten mi pathum (1)Sanglianthanga s/o V.L.Hmuaka, Mamit (2) Lalzamliana s/o Buanga (L) Kolasib leh (3) Deep Mondal s/o Nikhil Mondal, West Bengal (Telecom Network Service) Bangladesh ram chhunga an rukbo chungchangah vawiin khan New Secretariat conference room-ah Pu R.Lalzirliana, Home Minister hovin meeting neih a ni.
Home Minister Pu R.Lalzirliana chuan Tuikuk misual tena an mi rukbo chhanchhuah hna thawk turin mimal ang leh pawl anga hmalak mai chi anih loh thu sawiin, Zofate kan inlungrual tlan a pawimawh hmasa a ni a ti a. Hemi kawngah hian party nihnate dah thain, engkim inpawh tlang veka hmalak a tul a ni a ti a. Pu Zira chuan nimin ni 20.1.2014 chawhnu dar 3:30 khan NLFT kut atangin kan Mizo pahnih rukbote chu lak chhuah an nih thu leh vawiin chawhma dar 11:30 khan Mizoram leilung an rawn kai thu puangin kan lawm hle a ni a ti a. Hei hi kan zavaia tanrualna rah a ni a, sorkar tha tichaktu pawimawh tak a ni a ti. Rukbote chhanchhuahna kawngah harsatna kan insiam ang tih hlau chungin fimkhur takin sorkar a kal a, tun hnu zelah pawh sorkar ngaichang thiam turin Mizo mipuite a chah a ni. He inrukbo chungchangah hian kan thalaite thinrimzia pawh kan hria tiin, Home Minister chuan hnam anga Kan tanrualna chu a fakawm hle a ni a ti a. Tlawmngai pawl hrang hrang YMA, MUP,MHIP, MZP leh MSU ten zaidawh tak leh misual nilote tihthlabara an awm lohna tura an hmalaknate chu lawmawm a tih thu a sawi bawk a. Vawiin meeting-a party dang an tel theilo chu pawi a tih thu a sawilang bawk a ni.
Home Minister chuan mi pathum rubotute zinga pahnihte chu Tripura Police ten an man thu leh an inpek thu sawiin, anni hian rubotute hi mi 12 (NLFT mi 6 leh Tuikuk hel 6) an nih thu an sawi a ni a ti a.NLFT mite hian silai AK-47 panga leh SLR pakhat an ken thu leh anni chuan ration leh thuamhnaw an phur a ni a ti. Pu R.Lalzirliana chuan Zoram mipuiten sorkar hmalakna zawldawh taka an thlawpnaah lawmthu a sawi a.He chhanchhuah hna thawktu Mizoram Police, a bik takin CID (Special Branch) te chungah lawmthu a sawi a, an inpekna leh thawhrimna a fakawm takzet a ni a ti. Hetih laia an rukbo pakhat Deep Mondal chhuah a ni velo chu kan lawm a kim theilo a ni tiin, chhanchhuah anih ve theih nan chawl mai lovin theihtawpin hma kan la chhunzawm zel dawn a ni a ti.
Home Minister chuan national newspaper pakhata Tuikuk hotu pakhat, A.Sawibunga’n diklo taka Mizote min sawina chu sorkar pawhin a ngaipawimawh hle a ni a ti a, Chief Secretary pawhin a chhinchhiah a ni a ti. Tripura a Tuikuk raltlante tana camp awm reng pawh hel ten tanchhanah an hman thin avangin thiah vat sorkarin a duh thu a sawi a, misual ten mi an rukbona hmunah police outpost siam tum anih thu a tarlang bawk a ni.
Meeting hian resolution pahnih a siam a :1) Sorkar hmalakna chak tak avanga Tuikuk hel leh NLFT ten November 23, 2013 a mi rukbo Sanglianthanga s/o VL Hmuaka, Mamit Charkawn Veng leh Lalzamliana s/o/Buanga (L), Kolasib te ni 21 January 2014 chhuah zalen an lo ni ta hi vawiina kalkhawm CYMA,MUP,MHIP,MZP,MSU leh MPCC te chuan lawmawm kan ti takmeuh a; chutih laiin Deep Mondal s/o Nikhil Mondal chhuah a ni ve rihlo erawh hriatthiam harsa kan ti a. A rang lama chhuah ve anih thuai kan phutin, sorkar pawhin chak takin chhanchhuah hna thawk zui zel se kan ti. 2) Mizo mipuite inlungrualna avang liau liau leh Mizoram Police,NGO leh sorkar hmalakna bakah kohhran mipuite tawngtaina zarah nunna em chan lova rukbote chhanchhuah an ni thei thin hi kalkhawm te chuan chhuanawm kan ti ti tak meuh a. Inrukbona harsatna kan tawh chang hian mipui leh mipui inkara inpuhmawhtawnna leh indemna ang chi hi thleng tawh lo se kan ti tih resolution ah tarlan a ni.
Meeting-ah hian tlawmngai pawlte leh party aiawhte bakah Lt.Col (Rtd) Z.S. Zuala, Parliamentary Secretary, Pi L.Tochhawng, Chief Secretaryte bakah official pawimawh an kal a ni.
