Nimin tlailam dar 5 rik hnu lawkah khan Basic Services To Urban Poor(BSUP) hnuaia chenna insak zinga building pathum, Durtlang venga mi chu a chhak lam kopang min in a nawr chhia a. He chhiatrupna thlengah hian hriat theih chinah mi 3 in nunna an chan a,  hliamtuar mi 8 an awm a ni.

 He thil thleng hi hriat a nih veleh a bul hnaia awm mitlawmngaite an thleng hmasa ber a. Sawrkar thuneitute lam atangin Agriculture Minister Pu C. Lalrinsanga, Deputy Speaker Er Lalrinawma, School Education  Minister Pu Lalchhandama Ralte, I&PR Minister Pu Lalruatkima, bialtu MLA Pu Vanlalhlana, Aizawl Bawrhsap Pu Vanlalngaihsaka, Chairman, Aizawl District Disaster Management Authority(ADDMA) leh sawrkar hotulian ten ADDMA kaihruaia hnuaiah SDRF te hnathawh hi a tawp lam thlengin an vil a.  Sawrkar mi pawimawh leh mi tlawmngai tam takin he lai hmun hi pan khawm tum mahse, chhanchhuah hna a khaihlak theih avangin mi tam zawk chu ADDMA chuan Durtlang leh Thuampuiah te lo ti dingin an kir tir leh a ni. Sawrkar, CYMA leh Vengchhung YMA te hmalakna in miruang senghawi leh BSUP in a chengte thiarchhuah leh awm lailawkna chu a hmunah ruahman nghal a ni. Police te,SDRF leh NDRF te bakah   First Responder aiawhin  YMA member tam tak, CYMA  President Pu Vanlalruata leh a thawhpui te nen  he lai hmunah hian a  tir lam atanga a tawp thlengin chhawmdawl hna thawkin  an awm bawk a ni.

He vanduaina thlenna hmuna chhanchhuah hnathawh viltu I&PR Minister Pu Lalruatkima chuan khuarel chhiatrupna lo thleng avanga nunna chan tate a lainat thu te leh an chhungte a tawrhpui tak zet thu a sawi a. Hliamtuarte leh chenna neilo te enkawlzui leh ngaihven zui kawngah pawh mipui te chu  sawrkar thlawp tlat turin a  sawm a ni. A theih anga chakin thil awmzia chhui chian sawrkar thuneituten  an tum thu te leh a senghawi hna  kalpui dan tur te pawh ngaihtuah a nih dawn thu a sawi a. Hetih lai hian chhui chianna a awm hma chuan mipuite ti chiai zawnga thu belhchian dawllo vawrh darh lo tur te leh mipui te pawh thu thang vel avanga buai lo turin a chah a ni.

Leitawlhin  a sut chhiat BSUP hnuaia Mirethei chenna in nei lo te puala Housing Complex  hi Durtlang Veng chuan hnuai zawk, Zuangtui atanga Selesih inkar Worlbank Road hnuaia awm a ni a. A sak hna hi National Project Construction Ltd(PCC) leh Royal Infra Construction Ltd ten kum 2009 khan an tan a.  He housing Complex-ah hian Building chhawng thum zel, a mala ding 20, Community Hall pakhat a awm . Lut leh chhuak an awm deuh reng nachungin nimin tlai, chhiatrupna  a thlen  thleng kha chuan chhungkaw tam tak an la cheng mek a ni.

Attachment

  • Loading attachment...