Nimin tlaia Durtlang BSUP (Basic Service to Urban Poor) hnuaia mi harsa zualte chenna tur In sak, lei tawlh in a hnawl chhiat takte chu Chief Minister Pu Zoramthanga’n a hmunah tlawhin chhiatna thlen dan te a enfiah. Chhungkaw buaina tawkte awmkhawmna Durtlang MC Hall leh hliam tuar Synod Hospital a awm mek tlawh bawkin Leitan YMA Hall-a ruang dah naah a kal bawk.

Chief Minister chuan “Tun tum chhiat tawhna hi a vanduaithlak tak tak a, mihring in kan tih theih piahlam thil thleng te pawh niin a lang a. A bika mi harsate chenna tura In sak hi a chhakah pialtlep lianpui, tui tam em em na hmun tan hmawk zawla sak a ni a. Ruahtui a lo tam khan a lo tawlh thla ta a. Chu chuan in kha a rawn su ta a ni a, in sak pawhin dawl zawh ngaihna a awmlo a ni. Zoram mipui ten chhiat tawkte tawngtai sak ila, sawrkar pawhin theih tawp a chhuah sak bawk dawn a ni” tiin a sawi. Chief Minister chuan mimal emaw, sawrkar emaw, tu pawhin In a din dawn chuan fimkhur pawimawh a tih thu a sawi a. He vanduaina avanga nunna chan ta mi pathum leh hliam tuar mi pariatte chu sawrkarin tihdan phung pangngai a neih zulzuia puih an nih tur thu a sawi. Hetiang chhiat tawh a thi te chu cheng nuai 4 pek thin niin, hliam tuar te chu an hliam nat dan azirin cheng nuai 2 thleng sawrkarin puihna a pe thin a ni.

Tun chhiat tawhnaah hian Chief Minister chuan mi thahnemngaite inpekna chu fakawm tiin, a bik takin Durtlang leh Leitan leh a chhehvel a mipui leh tlawmngai pawl hrang hrang ten tha an thawh dan te, zan a ruang tlaivarpuia an inpekna chu ropui a ti a. Disaster Management thawktute leh, a bik takin State Disaster Response Force ten mumal leh felfai taka hma an lak dan chu fakawm tiin an chungah lawmthu a sawi a.

Chief Minister chuan vawiinah Chief Secretary hova mithiamte - engineer leh geologist leh mi pawimawh dangte thu hovin chet lak zel dan tur ngaihtuah a nih tur thu sawiin, sawrkarin nakin zela fimkhur tlan theihna tura chhui chian ngai te enzui a ngaihtuah tur Inquiry Committee pawh siam ngai a tih thu a sawi.

Chief Minister hi Home Minister Pu Lalchamliana leh Minister, MLA leh Councillor te bakah Chief Secretary te, District Disaster Management Authority Chairman leh sawrkar thawktu pawimawh dangten an tawiawm a ni.