Environment, Forest and Climate Change Department hnuaia Mizoram State Biodiversity Board buatsaihin vawiin khan International Biodiversity Day leh BMC training chu I&PR Auditorium, Champhaiah neih a ni a. He hun 'Our Biodiversity, Our food, Our health'.  tih thupui hmanga neih hi Forest department changtu Minister Pu TJ Lalnuntluanga chuan khuallian niin a hmanpui a ni.

Minister Pu TJ Lalnuntluanga chuan thusawiin Pathian malsawmna kan dawn nungcha leh ramngawte humhalh kawngah tan lak thar angai a, Champhai Master plan tunhnaia tharthawh mek pawh biodiversity venhimna tura tangkai tak tur leh hemi kawnga hmalakna pakhat a ni, a ti a.  Sava leh nungchate nasa taka suat ani thin chu a vei thu leh  Home Department bultumin Arms Act ennnawn mek niin Air gun te pawh mumal leh felfai zawka  licence siama khuahkhirh tum anih thu a sawi a. Forest Minister chuan nungcha, thing leh maute chu  Pathian malsawmna min pek ani tih kan hriat thar leh angai a, hengte kan tihchereu leh zel chuan a tuartu tur chu keimahni bawk kan ni, a ti a. Ramngaw kan neihte ram dang mi ten min humhalh sak dawn lo a, keimahni ngei kutah a innghah tlat avangin mitinten kan mawhphurhna kan hlen a tul a ni, a ti a. Thingphun chu then thum a kalpui  tum niin,  Khawpui, Thingtlang, Luikam leh Kawngkama thingphun beihpui thlak tum a ni a,  phun tam aiin phun nun tam tum a ni, a ti a. Thing tiak phun belh nung tha leh lo ai chuan thinglian sa phun a tihpuitlin tum anih thu a sawi bawk.

Minister chuan  Green Park tam thei ang ber siam a ngaihtuahna  sen mek zel anih thu leh  nakin zela ram hmasawnna ngaihtuah chung zela  ram ngaw leh  nungchate hunhalh angai a, tlai luat hma a humhalh kawnga tanla thar tura   kalkhawmte  chahin International Day for Biodiversity chu  lawm takin a hawng a ni.

Pu C.Vanlalena, IFS, Conservatory of Forest , Southern Circle pawhin thusawiin Biodiversity day puala training nei tur Biodiversity Management Committee member leh NGO te chu duhsakna hlanin training hmanga intuaithar turin a fuih bawk.

He hun kaihhruaitu Pu C.Lalbiaka IFS, Champhai DFO chuan mit ngeiin biodiversity danglam chak zia hmuh anih thu leh kum  2020 ah India khawpui 21 in leihnuai tuikhawl an nei tawh lo tura chhut a nih thu a sawi a. Khawlum chak lutuk chu Champhai ngei pawhin a  tuar ve tan tawh a,  khawlum a tha thin April par leh Lamkhuang te pawh a parin a rah ve tawh a, hengte ngaihtuah reng chungin vawiin hian zirchianna neih tum a ni a ti bawk.

Thusawitu dang Pu PC Rosiama, Honorary Wildlife Warden, Champhai District chuan thangtharte thinlungah  khuarel thilsiam leh Mihringte  inkungkaihna zirtira a taka an hmuh ngei theihna tura  kaihhruai an  ngai tawh a ni, a ti a. Silai changkang leh hmanraw dang hmanga nungchate  tihchereu chu khawtlang  tangho a do tlat angai a, thil thalo lo thleng thin tam tak te khuanu duan ramngaw leh nungchate hmanga  kan do let ve theih thu a tarlang bawk.

Chawhnu lamah Technical session neih a ni a, he hunah hian Pu Rongura Hrahsel, ACF, Aizawl Forest Division leh Dr Lalneihpuia Chhakchhuak, Technical Assistant, Mizoram State Biodiversity Board ten zirtirna BMC te hnenah an pe a ni.