No.4473/2021-2022
Aizawl the 31th March, 2022: Fostering Climate Resilient Upland Farming System in the Northeast (FOCUS) project kaltlanga A.H & Vety. Department, Champhai District-in FOCUS Project first installment kaltlanga 'Mithun Shelter-Community Level and Water Supply Facility for Grazing Area’ tih hnuaia khawtlangin an inhman tawm theih Se in, tuikhur leh venbuk Vapar lungchuang rama sak chu vawiin chawhnu dar 3:30 khan Dr. B.Zonghinga, District A.H & Vety. Officer, Champhai chuan hman theih turin a hawng.

Dr. B.Zonghinga chuan Sial chu mizote nuna bet tlat leh ngaihhlut tak a nih thu tarlangin, Se in hawn tak chu Se rualte khalhkhawma vaccine pek leh damloh thulha enkawlna hmun, khawtlang inhman tawm theih tur a nih thu a sawi a. Champhai District-a Sial vulh khua 20 ten Sial 2,000 chuang an vulh mek anga chhinchhiah a nih thu sawiin, UNO hnuai IFAD kaltlanga FOCUS Project hnuaia hmalakna zinga Vapar khua a awm chu a lawmpui thu leh Se In, tui pekna leh venbuk hawn chuan rah tha zawk a chhuah ngei a beisei thu a sawi a. Mineral Block siamna, ran damloh leh enkawl tul changa thlunbehna travis leh tul dangte pawh ngaihtuah zel tum a ni, a ti a. Sevulh chu sawrkarin a ngaipawimawh thu tarlangin, Se vulhtute chu FOCUS kaltlanga hmalaknate chu tangkai taka hmanga, eizawnna ngelnghet neih theih nana theihtawp chhuaha vulh pung deuh deuh tum turin a chah a ni.

He hunah hian Vapar VC atanga thusawi ngaihthlak niin, Lungchuang Ram Sialvulh Association, Vapar hnen atangin report ngaihthlak a ni bawk.

Se in leh tuipekna 'Mithun Shelter Community Level and Water Supply Facility for Grazing Area' tih project hi FOCUS hnuaia thawh niin sawrkar kum kalta khan DVO Champhai huam chin Champhai District chhunga khaw 8; Farkawn, Samthang, Vangchhia, Sazep, Lianpui, Khuangleng, Hnahlan leh Tualchengte bakah, Khawzawl District-a Vangtlang leh Saitual District-a Kawlbem-ahte hawn a lo ni tawh a. A thawhhnihna turin tun financial year chhung hian Champhai District-a khaw 5; North Khawbung, Khuangphah, Vapar, Ruantlang leh Vaphaiahte hmalak a ni ve leh a; North Khawbung, Vaphai, Ruantlang leh Khuangphah amite hi a hmain hawn fel a ni tawh a, vawiina hawn fel tak Vapara mi hi hawn hnunhnung ber a ni. Se tlatna hmunte a tul anga hungna tur thirhlingnei roll 120 theuh heng khuate hi pekchhuah chhoh mek zel an ni bawk.

Se in zau zawng hi a dung feet 36 leh a vang feet 18 a ni a, heng bakah se tuikhur leh venbuk sak a ni bawk. A.H & Vety. Department Champhai chhinchhiah danin Vaparah hian Sevulh chhungkua 7 awmin Sial 72 vel an vulh mek a. Kum 30 kalta atang khan Sial an vulh tan a ni.

He hunah hian Pu M.S Dawngliana, District Project Manager, FOCUS Champhai; Dr. Lallawmkima DIPRO; Dr. P.L Lalruatfela VO, thawktu dangte, Se vulhtute leh khawtlang hruaitute an tel a ni.