No.4474/2021-2022
Aizawl the 31st March, 2022: Vawiin chawhma dar 11:00 khan Khawzawl District chhunga e-District kaltlanga Certificate hrang hrang pekchhuah kawnga thawktu Common Service Centre Village Level Entrepreneur (CSC VLE) te chu Pu C.C. Lalchhuangkima, Deputy Commissioner, Khawzawl District hovin DC Conference Hall, Khawzawlah an thukhawm.

Bawrhsap Pu C.C. Lalchhuangkima chuan meeting-ah hian thu sawiin, CSC VLE te chu thahnemngai taka an thawh thinna-ah lawmthu a hrilh a. E-District kaltlanga certificate pekchhuah kawngah VLE te chuan mawhphurhna sang tak an nei tih sawiin, a bik takin Tribal Certificate leh Residential Certificate te chu a nei thei dik takte chauhin an neih theih nan fimkhur taka dilna lo lut te endik thin turin a chah a ni.

Meeting-ah hian Khawzawl District chu CSC 2.0 scheme ah pilot District atan thlan a nih thu tarlan niin, CSC kalphung tlangpui inhrilhfiahna, chanchinbu leh social media a tarlan theih tur chu DC Office in lo buatsaih nise ti a rel a ni bawk.

E-District kaltlanga certificate dil leh pekchhuah hi Khawzawl District-ah chuan October 16, 2020 atanga tih tan niin, vawiin chawhma dar 11:00 thleng khan Khawzawl District huamchhungah E-District kaltlangin Certificate 2,287 pekchhuah a ni tawh a, heng zinga 682 hi Tribal Certificate niin, Residential Certificate 633 leh Income Certificate 972 pekchhuah a ni tawh a ni. Vawiin meeting-ah hian Certificate dilna fee, Sawrkara chhunluh tur lakkhawm nghal a ni bawk.

Khawzawl District chhungah hian CSC VLE pasarih an awm mek a. Chungte chu Khawzawlah Pu Lalrotluanga Ralte leh Pu Malsawmkima, Khawhaiah Pu Zothantluanga, Chhawrtuiah Pu David Lalramkima, Kawlkulhah Pu Benjamin Zorinmawia, Sialhawkah Pu R. Lalsangpuia leh Biate-ah Pu Michael Lalruatsanga te an ni.

Meeting-ah hian CSC VLE te bakah Pu James Lalnithanga, SDO (Sadar) leh Pu H.Lalramenga, SDC te an tel a ni.

Attachment

  • Loading attachment...