No.4475/2021-2022
Aizawl, 31st March, 2022 : New Delhi a cham mek Minister Dr R. Lalthangliana chuan vawiin khan sawrkar laipuia official pawimawhte a dawr chhunzawm a, Minister hi Pu K.Vanlalvena, MP (Rajya Sabha), Pi Florence Zotluangpuii, Director, Pu Laltanzuala, Jt.Director, C&I, Govt. of Mizoram ten an tawiawm a ni.

Dr Thangtea hian TV Somanathan, Union Finance Secretary hmu hmasa berin Mizoram a micro-enterprises sumdawnna tenau nei ho Covid-19 vanga harsatna lian tak tawkte tanpuina leh chhawmdawlna tur nikum December, 2021 a amah ngeiin Union Finance Secretary hnena a lo thlen tawh chu a thlen nawn leh a, Union Finance Secretary hian lo ngaipawimawhin, PM Special Package lam atanga ti turin hma a la dawn tih a sawi a, ziakin lo a lo bawhzui ngei dawn tih a lo hrilh a ni.

Hemi zawh hian Dr. R.Lalthangliana chuan Shri BB Swain, Secretary, MSME chu a office ah a hmu leh a. Hetah hian Additional Secretary, Development Commissioner, MSME te pawh telin, MSME hnuaia Mizoram tana scheme thar a hmalakna tur chi hrang hrangte Dr. Thangtea hian a sawipui a. A bikin promotion of MSMEs in NER and Sikkim hnuaia dil mek heng scheme pasarih :-

1. Development of Roads in IGC, Luangmual
2. Solar Plant and Power Distribution Network in IGC, Luangmual,
3. Construction of Flatted Factory Complex in IGC, Luangmual,
4. Development of Roads in EPIP, Lengte,
5. Solar Plant and Power Distribution Network in EPIP, Lengte,
6. Construction of Flatted Factory Complex in IIDC, Pukpui,

7. Construction of Flatted Factory Complex in IIDC, Zote a zavaia belhkhawma cheng vaibelchhe Rs. 67.45 man hu tur chu Dr. Thangtea hian khun khan takin a sawipui a, Pu Swain a hian a thil thlen hi lo ngai pawimawh in theih anga hma lo lak pui zel a tum thu a lo hrilh a ni.

Minister hian Shri Anil Kumar Jha, Secretary, Tribal Affairs hmu lehin nikum lama Tribal Affairs Ministry hnena ‘Proviso to Article 275(1) tlawh chhana Mizoram chhunga health sub-centre hrang hrangte tihchangtlunna tur cheng vaibelchhe 14.44 man project proposal a lo thehluh tawh chu a sawipui a, hei hi Secretary hian lo ngai pawimawhin Mizorama Health department in kalphung an neih ang thlapa thehluh a ni chu tha a tih thu sawiin, Union Minister hnenah a rang thei ang bera a sawipui tur thu Dr. Thangtea hi a lo hrilh a, sorkar kum thar 2022-23 atana ngaihtuah chhunzawm a nih tur thu a lo hrilh a ni.

Chawhnu lamah Pu Dr. Dharmendra Singh Gangwar, Secretary (Border Management), Ministry Of Home Affairs leh Lt. Gen. Rajeev Chaudhry, Director General, Border Road Organisation, Ministry of Defence te chu Minister hian a hmu leh a. Darzo Kai (Tuipui D), Hnahthial District a lei (bridge) sei tuna pick-up truck kal theihna chang chang hi kawng pawimawh, Lawngtlai District leh Siaha District te nena inkalpawhna tura atana kawng pawimawh lutuk a nih avangin, hun rei tak atanga Mizoram chhim lam mipuiin an nghahhlelh em em a nih thu a sawi a, hei hi ngaih pawimawh sak a, harsatna siam lova a rang thei anga tihhlawhtlin sak turin a thlen nawn leh a ni.

Nimin tlai lamah khan Dr.Thangtea hian Boeing India Hqrs. New Delhi tlawhin, hetah hian India rama an hotu lal ber Pu Salil Gupte, President & CEO leh Pu Dr. Rajat Jain, President, Doctors for You te nen inkawmna hlawhtling tak an nei thei bawk a. Hetah hian Health Minister hian Mizoram chhunga hospital hrang hrang leh PHC zawng zawng tana portable x-ray machine, diagnostic lab (thisen, zun leh ek test na) leh ECG khawl te, tin, complete advanced level-ICU Aizawl Civil Hospital atan te mamawh anih thu a thlen chu an lo bengkhawn sak hle a. Anni hian ziak a Niti Aayog kaltlanga thehlut tura thurawn an lo pek chu Minister hian bawhzui in, vawiin khan Niti Aayog ah ziakin a theh lut nghal bawk a ni.

Nimin tlaiah vek khan Dr.Thangtea hian Aids Healthcare Foundation (AHF), New Delhi ami chu tlawh lehin, an Country Director, Dr. Sam-a nen inkawmna hun tha tak an nei bawk a. Country Director chuan Minister hi an hmunpuia HIV/AIDS Clinic fanpuiin changtlung zawk leh tunlai khawl hmanraw /bungraw changkang tak tak te hmanga AIDS enkawlna an lo neih chu a lo tlawh chhuah pui vek a. Tun hnaia Minister in USA a tlawh tum hian AHF Wellness Center, Dallas, Texas ami pawh a tlawh tel bawk a ni. AHF hotute hnenah hian Mizoram chu India rama HIV/AIDS hri vei tamna hmun a nih avangin heng AIDS enkawlna changtlung hi Mizoram tana chhawpchhuah sak ve turin a ngen chu a, State sum seng tel miah lovin Aids healthcare foundation te hian Mizoramah MSACS te nena tang kawpin AIDS Wellness Center changtlung tak, hmanraw/bungraw changkang zawk chu rawn din pui thuai an tum thu an lo hrilh a ni.