No.18/2021-2022

Lunglei, 5th April, 2021: Tunlai Lungsena Vawk natna a veite zaa za (100%) thih theihna thlen mektu hri laka mipui te fimkhur turin kan inchah a, he hri in Lunglei khawchhung leh a chhehvel a lo luh loh nan heng a hnuaia lo invenna atana hriattur te hi khawngaih taka zawm hram turin mipui leh Vawk vulh tute kan inhriattir a ni.

1. Lunglei Bawrhsap-in District dang leh khaw dang atanga Vawk lakluh khapna dan leh hrai a duante zawm hram turin kan inchah nawn leh a, chutih laiin Vawk note leh a talh tur chi sum dawnna atana kalpuia he dan pawisa lova a ruk a khaw dang leh District pawn atanga la luta, mipui leh Vawk vulh duhtute buma an hnena hralh ching an awm tih hriat a ni. Heng sundawnna, Vawk chinhriat loh hralh leh lo leisak atang hian natna hri nasa taka Vawk hrisel awmsaah te a thlen theih avangin, hetiang tih ching hriat leh man chhuah an awm a nih chuan dan anga an chungah action lak a ni ang.
2. Mahni Vawk in theuh pawnlam mi tlawhtir loh tur, thenawm te ran damlo tlawhpawh loh tur.
3. Vawk damlo reng reng dah hranna bik siam a, a damloh chhung chu dahhran tur (Quarantine).
4. Vawk In leh a velte, Vawk chaw pekna leh hmanrua dangte tihthianghlim fo tur a ni a, hengte hi hman thin nise – (1) Bleaching Powder (2-3%) (2) Chinai tui (1%)
5. Vawk vulhlai chhan leh vang hmuh tur awm lova thi thut a lo awmin, phum bo mai lovin bialtu Field Staff hriattir vat tur a ni
6. Vawk thi reng reng paih mai lovin 3 feet a thuk tala chinai nen phum tur a ni.
7. Ran damlo chaw pekna hmanrua reng reng, a damlai chaw pek nan hman pawlh loh tur a ni.
8. Ran enkawltuin thawmhnaw hak bik leh gum boot tihfai awlsam bun bik neih tur a ni.
9. Pawnlam chaw ningnawi pek loh a him ber a, kan pe a nih pawhin uluk taka chhuan so that leh tur.
10. Vawk talhna leh puahna ningnawi te felfai taka phumbo tur.