904/2023-2024

Aizawl the 24th June 2023:  UD & PA changtu Deputy Chief Minister Pu Tawnluia chuan vawiin khan Vanapa kawtzawl atangin Smart City Mission kum-8 tlin lawm nan Aizawl Smart City Limited leh Mizoram Cycling Association tangkawpin a an buatsaih cyclothon a vailiam. Cyclists-te hian Vanapa Kawt atangin AMC Thuampui thleng an tlan dawn a ni.

Cyclothon vailiamna hunah hian Deputy Chief Minister chuan Smart City Mission chu kum-8 kal ta khan India ram Prime Minister Pu Narendra Modi an a hawng tiin India ram puma khawpui 100 thlan chhuahah kalpui a nih thu a tarlang a.Khawpui tih changtlun leh tihchangkan chu he mission tùm ber a ni a ti. Pu Tawnluia chuan Smart City hnuaia khawpui thlan chhuah zinga tel tur chuan tehfung hrang hrang a awm a ni tiin Mizoram pawh chung tehfung a zawh fel hnuah kum-2018 khan pawm a nih thu a tarlang. Covid hripuiin kum-2 chhung a thutchilh avangin hmalakna te duh angin chak lovin tithuanawp deuh mahse Aizawl khawpui thuam mawi a tih changkan nan tun dinhmunah project-40 chuang kalpui mek a ni a ti. Smart City hnuaia hmalaknate chu kum-5 chhunga zawh fel tur tih a nih laiin Covid avangin kum-1 đang pawhsei a ni tiin nakuma zawh fel hman tumin nasa takin an kalpui mek a ni a ti bawk.

Deputy Chief Minister Pu Tawnluia chuan Smart City Project hnuaiah thalaite hmakhua ngaiin an hawiharhna tur leh khawvel zau zawk an thlir na tur project hrang hrang kalpui mek a nih thu a sawi a. Thalaite changkanna leh hmasawnna tur atan nasa taka thawh mek a ni tiin he project hnuaia sak playground, information Kiosk leh intihhlimna hrang hrangte chu dimdawi a, neitu rilru pu theuh turin kalkhawmte a chah a, Aizawl khawpui veng tina mipuite thawhho puiah a sawm bawk a ni. 

Vawiina cyclothon vailiamna programme-ah hian UD & PA Secretary, Aizawl Smart City Chairman ni bawk Pu Lalmalsawma Pachuau leh Aizawl Smart City CEO Pu CC Lalchhuangkima bakah Mizoram Cyclist Association President Dr. Franklin Lalrinngheta leh cyclists mi thahnem tak te an tel ani.