1933/2023-2024

Aizawl The 19th September, 2023: Kumin September ni 15 atanga October ni 2 thleng hman tur SWACHHATA HI SEVA (Cleanliness is Service) chu vawiin khan Mizoram Rural Bank (MRB) Auditorium, MINECO Aizawl-ah Deputy Chief Minister Pu Tawnluia chuan khuallian niin a hawng.

Pu Tawnluia chuan faina pawimawhzia hriain kan hnampa Pu Mahatma Gandhi suangtuahna a ropui hle a ni tiin faina lama kan inzirtir zel nan a piancham hriatreng nan hetiang programme kan hmang thei chu a lawmawm hle a ni a ti. ODF (pawnlera inthiar awmlohna) lama a department enkawl UD&PA leh PHE hnathawh chu lawmawm a tih takzet thu sawiin Subject pakhat faina leh thianghlimna chu inngheng reng an nih angin thawhhona tha nei chhunzawm zel turin duhsakna a hlan a. Tunhnaiah Aizawl Solid Waste Management Centre SIPMIU enkawl thin chu AMC-in a enkawlna kawngah mawhphurhna a lak tak avangin an zangkhai phah hle a ni tiin Mizoram state pumpui ODF kan nih theih nan tha leh zung sengtute zawng zawng chungah lawmthu a sawi bawk. PHE hmalakna avanga Mamit District ODF Plus District awmchhun a ni thei chu a lawmpui tak zet thu sawiin Mamit WATSAN Divison Executive Engineer (EE) leh a thawhpui zawng zawngte leh Mamit DC bakah District mipuite hmalakna leh thawhrimna-ah lawmthu a sawi bawk. Khawtlangin bawlhhlawh paih leh sawngbawlna kawngah kan tanrual a pawimawh hle a ni tiin mipui rilru-a faina leh thianghlimna pawimawhzia bakah naupangte rilru-ah pawh tuh ngheh anih theih nan awareness campaign kalpui uar lehzual turin department hotute chu a chah a, tunhnaia The Mizoram Protection of Rivers-in kan tuihna leh tuihnar bakah kan luite enkawlna leh humhalh an nih theih nana dan Assembly a an siam chu lawmawm a tih thu a sawi bawk a ni.

State Level Launching of Swachhata Hi Seva programme hi Swachh Bharat Mission (Urban) 2.0, UD&PA Deptt. Govt. of Mizoram buatsaih niin Pu Lalmalsawma Pachuau, Secretary, UD&PA-in a kaihruai a, Mizo leh faina hi zir tham a awm a, keimahni leh kan inchhung fai viau mahse kan vantlang hmun leh mipui punkhawmna hmun te hi a fai tawk lo hle thin chu a ngaimawhawm thu a sawi.

Dr. Andrew H. Vanlaldika, Director, UD&PA chuan Swachhata Hi Seva chuan Faina hi Rawngbawlna tih thupui hmangin thu a sawi a. Pi Zarzokimi'n faina lama thutiam (Pledge Taking) kalkhawmte a laktir a, kumin faina hapta thupui chu Garbage Free India (Bawlhhlawh awm lo India) tih a ni.

Vawiin inkhawmah hian SHS & ISL (Swachhata Hi Seva Indian Swachhata League 2.0) Volunteers leh Safaimitras (thianfaitute) chawimawina hun hman nghal a ni, Khuallian atangin certificate leh thilpek an dawng a, Govt. Hrangbana College, Govt. Aizawl College, Govt. Johnson College, Mission Veng Youth Adventure Club, Pachhungah University College leh Govt. Zirtiri Residential Science College naupangte'n September ni 15 leh 16 a cleanliness drive an neih lawmpui nan pawisa fai leh chawimawina certificate hlan an ni bawk.

Motor 151 bawlhhlawh khawn nan AMC-ah hman thin a nih thu Pu Lalremruata Kullai, Jt. Municipal Commissioner, AMC chuan a sawi a, Aizawl Khawpui chu Open Defecation Free (ODF) ata ODF plus (daipawna inthiar awm miah lohna) ni turin hmalak mek a ni a ti bawk. AMC hnuaia an hmalakna leh an hnathawhte he huna hian sawiin bawlhhlawh khawn kawngah leh bawlhhlawh thliar kawngah harsatna an tawh thin thu a sawi bawk a ni. July thla atang khan AMC Ward 19-ah door- to-door bawlhhlawh khawn khawm a nih theih nan a enchhinna kalpui mek a ni a ti.

PHE Deptt.-in Faina lamah an hmalakna Er. C Lalremsiama, Secretary, PHE chuan sawin Mamit District chu faina tehkhawng hrang hrangah Model District a ni thei chu a lawmpui thu a sawi. Pu Romalsawma, Mission Vengtlang chuan kan bawlhhlawh paihin eng angin nge min nghawng tih thupui hmangin a lem nena entirin hun a hmang a, "Kan bawlhhlawh paih vangin mirethei zawkte, lui leh luidunga eizawng thin te harsatna siamtu kan ni," a ti a, Aizawl khawchhunga Rul tam chhan pawh kan bawlhhlawh paih ka fimkhur loh vang a ni a ti bawk. Pu Malsawmzuala, Jt Director, UD&PA chuan Solid Waste Management chungchangah thusawina hun a hmang bawk a ni.

Faina lama Ambassador, zaithiam Young Fella bakah sawm bikte vawiin Swachhata Hi Seva launching programme-ah hian an tel a ni.