1934/2023-2024

Aizawl, 19th September, 2023: Land Revenue & Settlement minister Pu Lalruatkima chuan vawiin khan Assembly Conference Hall, Aizawlah Mizorama a bul tanna atan online (internet) kaltlanga chhiah pekna "online tax & zoram chhiah payment" a tlangzarh a, Survey of Villages Abadi and Mapping with Improvised Technology in Village Areas (SVAMITVA) Scheme hnuaiah Property Card a sem bawk. He hunah hian Pu Rochhunga Ralte, Vice-Chairman, Land Revenue & Survey Board bakah MSeGS, HDFC Bank leh Revenue Department hotute, sawm bik mi pawimawhte an tel a ni.

Assembly Conference Hall-a inkhawm buatsaihah khuallian Pu Lalruatkima chuan vawiina kan thil tawn hi a ropui a, Mizoram tan mellung pawimawh tak phunna ni a ni a ti a, online revenue payment system hi hun rei tak ata tawh neih ve kan chak leh kan nghahhleh em em a ni tiin, a hlawhtlinna tura theihtawp chhuahtute zawng zawng chungah lawmthu a sawi a ni. Chhiah pek chu khua leh tui ten kan tih tur, kan mawhphurhna a ni tih kan hriat a pawimawh a, a hun taka chhiah pek hi kan tum a pawimawh a, kan inzirtir pawh a tul hle a ni a ti a. He online payment system thar hmang hian mipuiten mahni inchhuglum atangin chhiah awlsam takin kan pe thei tawh dawn a ni a ti.

National Generic Document Registration System kalpui mekah Sub- Registrars’ Office (SRO) pawh district thar 3 - Khawzawl, Hnahthial leh Saitual tih loh district dang zawngah hawn a nih tawh thu sawiin khuallian chuan document hrang hrang kan neih te, thurochhiah thlengin SRO hnenah kan register (ziah luh) a pawimawh a, court-ah thubuai hlabuai a awm pawhin heng document SRO hnena register tawhte hi chu sawrkar document a nih tawh avangin thiam chan a awlsam zawk tawh a, kan register loh chuan harsatna kan tawk thui thei zawk a ni a ti.

Pu Ruatkima chuan stamp registration kaltlangin Revenue department in chhiah tam zawk an hmu tih sawiin, heng chhiah an hmuhte hi Zoram hmasawnna turin a theih ang anga hman zel a ni a ti a. district thar 3 ah Settlent Officer’s Office hawn a nih tawh thu a sawi bawk. Vawiina a sem chhuah tak Property Card chu LSC nen a danglam loh thu sawiin, dan anga ram neitu nihna mipuite hnenah a pek thu te, Property Card hmangin mipui ten awlsam zawka loan an lak theih tur thu leh zangnadawmna lak kawngah pawh VC Pass-in a huam ve loh ram hlutna ( land value) chhut tel a nih tawh tur thu te a sawi a. Sawrkarin hmasawnna tura ruahmanna a siamte chu mipuiin an tawiawm loh chuan a hlawhtling thei lo tih sawiin Zoram mipuite chu sawrkarin an tana ruahmanna a siamte belchianga a hlawhtlin theuihna tura thlawp tlat turin a sawm bawk a ni.

Minister Pu Lalruatkima’n vawiina hawn tak online revenue payment system hnuaiah hian land tax leh zoram chhiah pekna module hran ve ve awmin online portal “landtax.mizoram.gov.in” kaltlangin chhiah a pek theih tawh dawn a, a bul tan nan Aizawl Municipal Corporation (AMC) huam chhung atan hman phawt a ni ang a, a hlawhtlin dan azirin huang zauh a Mizoram pum tuam chhuah tum a ni. CSC hrang hrang kaltlangin chhiah hi a pek theih bawk dawn a, a tangkafaia pe duh dan Revenue office ah kalin a pek theih dawn a ni.

Online payment bank partner atan HDFC bank hman a ni a. LR&S leh HDFC bank te hian November, 2021 ah inremsiamna thuthlung (deed of agreement) ziakin February, 2022 ah Law & Judicial department in an vet a, Mizoram State e-Governance Society (MSeGS) in a software hi a thlawnin an siam sak a, anni hian a enkawl zui hna an thawk bawk ang.

SVAMITVA Scheme hi sawrkar laipui Ministry of Panchayati Raj hnuaia Central Sector Scheme a ni a. He scheme hnuaiah hian drone hmangin thingtlang khuaa mihring chenna hmunte thlalak a ni a, thlalak hmang hian Property Card siam sak theuh an ni. Property Card kaltlang hian mipuite chu dan anga ram neitu nihna pek an ni a, hei hian ramri chungchanga buaina a tihtlem bakah khaw hmunhma ruahman (town & village planning) leh loan lak kawngah te awlsamna a thlen beisei a ni. Sawrkar laipuia Ministry of Panchayat, state sawrkar Land Revenue & Settlement Department leh Survey of India te thawhhona hnuaiah he scheme hi kalpui a ni a.

Tun dinhmunah Mizoram khua 319-ah he scheme hi kalpui tura ruahman a ni a, khua 171-ah te drone hmanga thlalak tan a ni tawh a. Hmarchhak state zingah Phulpui leh Tachhip te hi Property Card semchhuahna hmasa ber niin, April ni 24, 2023 khan Property Card 420, Phulpuiah card 166 leh Tachhipah card 254 semchhuah a ni a. Vawiin hian khaw 7 – Thiak (161), Sumsuih (158), Hmuifang (63), Lamchhip (113), Chamring (56), Sailam (164) leh Lungsei (48) ah te Property card 763 khuallian hian a sem chhuak a, heng khaw Village Council hruaitute hnenah map – VC area chunga ram neitute hming leh an ram neih chin tarlanna a hlan bawk a ni.

Vawiin inkhawm hi Pu R. Zarzosanga, IAS, Commissioner & Secretary, Land Revenue & Settlement chuan a kaihruai a, Pu Isaac Zothanpuia, Project Manager, MSeGS in technical report a pe a, Pu John Varte, Cluster Head, HDFC Bank (online payment partner bank) in thu sawiin, Pu V. L. Hruaizela Khiangte, Director, Land Revenue & Settlement in lawmthu sawina hun hmangin a khar a ni.