No.1991/2021-2022
Aizawl, 25th August, 2021 : Ministry of Jal Shakti, Department of Drinking Water & Sanitation hnuaia Swachh Bharat Mission (Grameen) Phase II hmalakna, 100 Days Campaign - “Sustainability of ODF gains and achieving million soakpits chu vawiin khan Dy.Chief Minister leh PHE Department changtu Minister ni bawk, Pu Tawnluia’n a office chamber ah a hawng a. He campaign hawnna hi India ram state tinah a rualin vawiin August 25 hian neih a ni.

Pu Tawnluia chuan kum 2014 a Swachh Bharat Mission kalpui a nih atangin faina leh thianghlimna kawngah India ram leh Mizoram pawhin hmuh theihin hma a sawn thu sawiin tunah chuan India ram pumpui chu Open Defaction Free(ODF) niin pawn lera inthiar awm lohna ram tia chhal theih a lo nih tak thu a tarlang a. Swachh Bharat hmalakna hi a bik takin thingtlanga cheng, mi rethei zawk ten an chhawr tangkaiin faina leh thianghlimna kawnga ramin hma a sawnna hi a khaihlak lohva, hmasawnna ngelnghet a nih theih nan leh ODF Plus ni tura ngawrh lehzuala hma lak nan Swachh Bharat Mission Grameen Phase II chu kalpui a lo ni leh ta a ni, a ti a. He ni 100 campaign hi district tinah kalpui tur a nih thu sawiin Pu Tawnluia chuan thingtlanga chengte dinhmun hre rengin dawhtheihna leh hriatthiamna nen he campaign hlawhtlinna tur hian Department hotute chu programme mumal tak siama kalpui turin a chah a. Kum 2020-2021 chhunga PHE Department hnathawh tarlanna lehkhabu, Jal Jeevan Mission Mizoram Yearbook chu a tlangzarh nghal bawk a ni.

Ni 100 Campaign neih chhung hian tuichhe sawngbawlna leh tih riralna(soakpit) tam thei ang bera siam te; Ek-in chhia leh thawm that ngaite ngai pawhmawh tura inzirtirna beihpui thlak te; Insa thar leh indang thar te mahni puala ekin nei ngei tura inzirtirna beihpui thlak te; khaw tinah Gram Sabha neiha, faina leh thianghlimna lama khaw dinhmun enfiah leh hmalak dan tha zawk sawihona te nei turin ruahman a ni.

Campaign hawnna hi Er.Lalmuanzova, Secretary, PHE Department in a kaihruai a. PHE Department hotu lian te bakah lined department 2- Rural Development leh LAD atangin Secretary, R.D; Secretary LAD; Joint Secretary R.D leh Director, LAD te an tel a. Er.C.Lalremsiama, E-in-C, PHE Department chuan hun hnung kharna thu sawiin he campaign thil tum leh ruahmanna te a hlawhtlin ngei theih nan Lined Department te chu theihtawp chhuahpui ah a ngen a ni.