No.1992/2021-2022
Dated Aizawl, the 25th August, 2021: Vawiin khan Government Serchhip College Smart Classroom ah Beti Bachao Beti Padhao, Serchhip District programme pakhat "My Aim My Target Campaign" hmalaknain hmeichhe zirlai naupangte tan Special Career Awareness Seminar buatsaih a ni.

A hawnna inkhawm buatsaihah Pu Lalmuansanga Ralte, MCS, DC chu khuallian niin, khuallian hian kan thalaiten zirlai naupang an nih lai atanga tum fel tak neia lehkha an zir a tangkai thusawiin, hnathawh tum thlan fel sa neiha chumi pana theihtawp chhuah kal kha a kawng a tawiin a hlawk ber a ni, a ti. Seminar chu hlawk taka hman ngei tum turin zirlai naupang kalkhawmte a chah a ni. He hunah hian Pu PC Lalremsiama, Principal, Govt. Serchhip College pawhin thusawiin, hmeichhe zirlai naupangte puala Special Career Awareness Seminar buatsaih a ni chu lawmawm a tih thusawiin, a buatsaihtu BBBP Serchhip District chungah lawmthu a sawi a ni. He hun kaihruaitu Pu K. Saitluanga, DIPRO pawhin BBBP kalpui mek tlangpui sawifiahin Beti Bachao Beti Padhao hmalakna hian hmeichhiate venhim leh zirna lama tihhmasawn chu a tum ber a nih angin Serchhip District ah kawng hrang hranga hmalak mek a ni a, My Aim My Target programme hnuaiah hian N. Vanlaiphaiah leh Thenzawlah "Meet the IAS programme" kalpui tur a ni a, vawiina Special Career Awareness Campaign ang hi naktukah Govt. Serchhip Higher Secondary School ah neih a ni bawk anga, zaninah Lalro Digitals Studio ah hemi pual Talk Show hi buatsaih a ni bawk ang, tiin hmalakna tlangpui a sawi a. Seminar-a tel naupangte chu an hna thawh chak thlan tir nghal zel an ni ang a, karleh lamah an hna thlan thawk mektute nena inkawmna hun a hrana buatsaih sak leh vek an ni ang, tiin BBBP My Aim My Target an kalpui dan tur a sawifiah a ni.

A hawnna inkhawm hi Pi C. Laltleipuii, MCS, SDO, Sadaar in lawmthu sawiin a khar a ni.

A hawnna hun hman zawh hian Resource Person pahnih Pu Lalhruaitluanga, Founder, Zo Career Solution leh Pu C. Lalhriatpuia, MD Hillsgate ten College zirlai naupangte tana duhthlan theih sawrkar leh Company a hna chi hrang hrangte leh a luh dante, mahnia eizawnna din tura inbuatsaih dan te, College zawh hnua zirna sang zawk lut tura tih tur hrang hrangte zirtirna an nei zui a ni.