3750/2023-2024

Khawzawl, 9th February 2024: Tukin khan Dy. Govt. Chief Whip Pu W. Chhuanawma chuan Pradhan Mantri Gram Sadak Yojana (PMGSY) 2.0 hnuaia Khawzawl - Biate kawngpui thawmthat hna thawh mek chu a hmunah tlawhin, a enfiah.

22-Tuichang bialtu MLA ni bawk Pu W. Chhuanawma hi Chawngtlai khawtlang hruaitute bakah PWD Khawzawl Division-a thawktu ten an tawiawm a. PMGSY 2.0 hi March ni 31, 2024 a tawp tawh tur anih avangin hna chak taka kalpui dan tur harsatna la awm mek te chinfel dan tur an sawi ho a ni.

PMGSY 2.0 hnuaia siam mek Khawzawl- Biate Road hi kilometer 60 a thui a ni a. Kawng hi package 10 ah kilometer 6 theuha then niin, cheng nuai 9,320.68 senna tur a ruahman a ni. Khawzawl-Biate kawng hi PMGSY 2.0 hnuaiah kum 2019-20 khan sanction a ni a, Mizoram PWD Project Division - IV ten hun engemaw chen an enkawl hnuah June ni 5, 2023 atang khan PWD Khawzawl Division te kutah hlan a ni.

Pu W. Chhuanawma hian vawiin chawhma khan Khawzawl District Education Office, Sub-Divisional Education Office leh Block Resource Center te a tlawh bawk a. Thawktute nen inkawmna hun hlawkthlak tak an hmang a ni.