Dy. Speaker, Mamit Bialtu ni bawk, Pu John Rotluangliana chuan a bial fanna programme kal zelah vawiin khan Lengpui a tlawh a. Lengpui khawtlang hruaituten amah lawmna inkhawm Community Hall-ah an buatsaih sakah khaw mipui, zirlai leh sorkar hnathawk te an tel tha hle.

Khuallian Dy. Speaker chuan a thusawinaah sorkar thar chu Mizo mipuiten beiseina sang tak nen an thlir a, Pathianin Pu Lal Thanhawla hmanga Mizo mipuite tan zalenna dar a vua a, mipuite thla a muang a ni, a ti. Sorkar chuan Falkawn-a Referral Hospital leh Tuirial Hydel project te chhunzawm hna a thawh ngei tur thu a sawinaah Dy. Speaker chuan NLUP hi Congress party policy mai ni lovin Mizoram sorkar policy a nih thu a sawi a. Mizoram atana NLUP duan ang chu India rama state dangte tan ruahman a ni lova, Prime Minister pawhin Mizoram mipuite chu thlamuang taka awm turin a chah nghe nghe a ni, a ti bawk. Lengpui Beautification programme kalpui mek a nih thu te, Lengpui Mini Sports Complex DPR siam mek a nih thu te sawiin Pu John Rotluangliana chuan ram leh hnam siam turin keimahni theuh kan pawimawh a, chuvangin mipuiten theihtawp kan chhuah a ngai ve a ni tiin kalkhawm te a fuih.

Community hall-a inkhawm banah hian Dy. Speaker chuan khawtlang hruaitute nen Lengpui khawchhung an fang kual a, siamthat ngai leh cheithat tul lai te an enfiah ho nghal a ni.