Tualcheng khawchhuak inzawmkhawm pawl, Tualcheng Welfare Committee Gen. Hqrs. Aizawl te chuan an khua a piang leh seilian Pu Vanhela Pachuau, IAS tunhnaia Mizoram Chief Secretary-a dah tak leh Rajya Sabha MP term hnihna hmang mek Pu Lalhmingliana te chawimawina pual inkhawm vawiin chhun khan I & PR Auditorium-ah an hmang a. An khawchhuak mi langsar zual deuh deuh Pu Zosiama Pachuau, Ex. Minister, Pu C.Vulluaia, Ex. Minister, Pu Lalrawna Sailo, IAS (Rtd.), Dr. CVL Auva, Advocate, Rev. S.R.Lalkailuaia, Ex. Moderator, Dr. C.Biakmawia, Director, B.H.R.C., Dr.H.Lallenmawia, Jt. Director, Geology & Mining te hnenah Life Time Achievement Award an hlan bawk.

 

 

Hemi pual inkhawm hi Tualcheng Welfare Committee Chairman Pu Gosiama’n a kaihruai a. Chief Secretary chuan Tualcheng khua te chu taimak leh rinawmah hming chher turin a fuih a, tunhma in Tualcheng khua hi zaithiam ah leh kawng hrang hrangah hming an lo chher tawh thin tiin Pu Vanhela chuan tunlai khawvela Mizoram in a mamawh ber ni a a hriat taihmak leh rinawm hi zir thar a tul a, chuvangin Tualcheng khua te chu hemi lama sulsutu leh hmahruaitu bakah Mizoram pum tana bul tan thar tu ni turin a chah a. Misual man reng reng te chuan an khaw hmingah Tualcheng lam lo se a duh thu a sawi bawk. Hetianga inchawimawi thiam hi a lawmthu sawi langin Tualcheng Welfare Committee chungah leh Pathian chungah lawmthu a sawi a. Chawimawi tlak dinhmuna hlangkai tu Mizoram sawrkar Chief Minister leh a thawhpui Cabinet Minister te chungah Pu Vanhela chuan a lawmthu a sawi lang bawk.

Rajya Sabha MP Pu Lalhmingliana pawhin hetianga chawimawina a pianna khua te ngeiin an hlan chu phu lo a in tih thu leh chawimawi tlak mitling leh mifel zawk tam tak an awm laiin kawng leh lamah chuan hetiang thil tih hian an pianna khua Tualcheng a chawimawi zawk a ni, a ti a. Ram pum aiawha Rajya Sabha member a nih angin Mizoram mipuite tana hmasawnna leh changkanna tur theih ang tawka a thawhna ah a pian seilenna khua mipuite chu amah tawiawmtu leh kawng tinrenga fin var tu ni thei se a duh thu a tarlang a ni.

Tualcheng Welfare Committee hi 1988 a din tan niin General Headquarters Aizawl-ah a nei a, khawchhuak leh tuna khua a la awm mekte hmakhua thlirin hna an thawk thin a. Tanpui ngai leh inchhawmdawl ngaite inpui tawnin lungrual takin an kal mek a ni. Tunah hian Aizawl khawpuiah Tualcheng khawchhuak chhungkua 293 awm mek a chhinchhiah a ni.