Mizoram sawrkar Department hrang hrangin kum 2008-2009 kum chhunga Small Savings thlirletna leh kum kal mek 2009-2010 chhunga hmalak dan tur sawihona inkhawm chu vawiin chhun khan I&PR Conference Hall-ah neih a ni a. Finance changtu Chief Minister Pu Lal Thanhawla’n he meeting hi hmanpuiin fuihna thu a sawi.

 

 

Vawiina meeting hi Finance changtu Principal Secretary Pu Lalsawta’n a kaihruai a, Chief Minister chuan sawrkar tha, chak leh rinngam siam turin sum lama inrelbawlna tha leh chak (efficient fiscal management) chu a pawimawh hmasa ber a ni a ti. Chief Minister chuan Mizoram sawrkar kalphung hrim hrim chu siamthat ngai leh hnawk then tur tam tak a awm thu sawiin sum lama inrelbawl dan te pawh enchian ngai leh fel lo siam dik tur tam tak a awm a.  Hengte hi sawrkar chuan theihtawp chhuahin a bei anga, a hmalakna ah mi huat hlawhna thil pawh thleng se sawrkar chuan tlak phah hial pawh ngamin a hmachhawn zel ang a ti. Mizote hi mahni sum lakluh ang mil zela khawsak thiam lo, sum khawl leh renchem thiamlo mi kan nih avangin sawrkar hnathawkte chu hetiang kawnga mipui zirtirtu tura ngaih an ni a, amaherawhchu, mite zirtir tlak kan ni em tih erawh mahni theuh inenfiah turin a chah a. Sawrkar sum chheprelh emaw tichengpen emaw a hmanna tur dik taka hmang thin lo emaw an awm chuan dim an ni lovang a ti. Sum khawl lam kan thiam loh avangin Co-Operative Movement pawh kan State ah a hlawhtling theilo ni a a ngaih thu tarlangin Pu Lal Thanhawla chuan mahni sum lakluh mil tawk zela sum khawl thiam chhungkuate chu chhungkaw hlawhtling an ni thin angin kan State pawh kan sum lakluh mil zela renchem leh hman dik kan thiam chu kan zirtur pawimawh hmasa ber a ni ang a ti.

Vawiina meeting ah hian kum kalta chhunga Small Savings a titha department te hnenah Chief Minister hian Trophy chi hrang hrang a hlan a, pakhatna Chief Minister Running Trophy chu Mizoram Legislative Assembly niin an target Rs. 7,00,000 chu Rs. 3118700 in an khum a za zelah 445.52 a ni. Pahnihna Finance Minister Trophy dawngtu UD & PA Department target Rs. 250000 niin Rs. 1055850 an hmu a, za zelah 422.34 in target an khum. Chief Secretary Trophy dawngtu SCERT chu pathumna niin an target Rs. 400000 a nih laiin 2008-2009 chhung khan Rs. 1377880 in an tlin a, za zelah 344.47 in target an khum bawk.

Department mal he Small Savings a chhunglut tamber lawmman Special Award chu School Education Department in a dawng bawk. Heng bakah hian Small Savings Agent atana mi ruat mi 61 zingah a titha zual mi 12 ten Incentive Cash Award an dawn chu Chief Minister hian a hlan bawk a ni.

He Small Savings hnuaia kum kal mek 2009-2010 chhung a Mizoram sawrkar Department hrang hrangten sum an khawl tur zat bithliah chu Rs. 165,495,000 a ni a. Hengte hi sawrkar hnathawk ten Payroll Saving hmanga an tlin tur a ni a, heng Payroll Saving te hi kum 5 a hmin in sawrkar hnathawk tam takin an chhenfak mek a ni. Kum kalta chhunga target pumpui chu Rs, 151,893,962 a ni a, hmuh zat Rs. 215,656,071 a ni.