Vawiin khan Sihphir Community Hall-ah MHIP Day vawi 44-na hman a ni a, Dy.Speaker Pu R.Lalrinawma chu Khuallian niin Sihphir VC Vice President Pu Malsawmtluanga Pachuau chu Khualzahawm a ni.
Khuallian chuan MHIP chu Mizoram pum huapa hmeichhe pawl inzawmkhawm lian ber an nih thu sawiin MHIP member ten mahni hamthatna tur ringawt ni lovin mipui vantlang mamawh hrang hrang atan hma an la thin chu fakawm a tih thu a sawi a. Kan ramah hian hmeichhiate chawikanna nasa takin MHIP in an kalpui a, hei vang hian hmeichhiate dinhmun a sang sawt hle a ni, a ti a. The Mizo Marriage, Divorce and Inheritance Act,2014 chu mizo hmeichhiate an chanvo dik tak pek an nih theih nana hmalakna a ni a, hmasawnna chhinchhiahtlak tak a ni, a ti a. Kan mizo tlawmngaihna te, inpumkhatna te, aia upa zahna te thangthar ten an vawn nun zel theih nan chhungkaw nu ber an pawimawh em em a, inchhungkhur atangin naupang zirtirnaah mawhphurna lian tak an nei a ni, a ti a. MHIP chu mipuite tana tangkai tur sawrkar scheme kalpuinaah an tangkai hle a ni tiin MHIP memberte chu an thupui ‘mite tanpui’ a nih angin midang tana malsawmna ni zel turin a fuih a. Mizo tawng hi mi thiamte chuan tawng ral tur zinga an ngaih a ni a, kan tawng ngei humhalhna kawngah pawh hian kan hmeichhiate hi an pawimawh hle a ni, a ti a. NEC bultumin Sihphir Multipurpose Hall sak mek a nih thu sawiin Tourism Department ten Sakawrhmuituai Tlangah skywalk siam tura an kalpui mek chu Sihphir khaw tana tangkai tur a nih thu a sawi a. Hun hlimawm tak hmang turin duhsakna a hlan nghal a ni.
Vawiin vek hian Dy. Speaker Pu R. Lalrinawma hian Sihphir MHIP In thuamthat chu a hawng a. Sihphir MHIP ten thuamthat hna hi kengkawhin MLA Fund atangin cheng 50,000 hmanga sak that a ni.
Sihphir Branch MHIP President Pi Vanlalpari chuan programme a kaihruai a. Secretary Pi Zomuankimi atangin Sihphir Branch MHIP dinhmun tlangpui ngaihthlak a ni a.Member boralte sunna hun hman niin kum 30 chhung hruaitu hlun Pi Zionthangi chawimawina hun hman a ni a. Khuallian chuan MHIP Day lawmpuinan cheng 3000 Sihphir MHIP President hnenah a hlan a. MHIP member kum 70 chin chunglam tan thilpek hlanna hun neih a ni bawk a ni. Sihphir MHIP hi bial hrang hrang 14-ah inthenin committee member zat 55 an ni a. He hunah hian VC,YMA, MUP leh MHIP member thahnem tak an tel a ni.
