NEDP hnuaia Lengpui Airport leh a chhehvel thuam mawina tur "Beautification of Lengpui Airport-Aizawl" project hnuaiah Tourism Department leh NSS Cell, Mizoram tangkawp chuan vawiin khan Sihhmui leh Lengpui Airport inkar kawngpui sir ah Saron (Bougaivillea) kung 300 an phun a, NSS hian a phun leh enkawlzui hna an tum ang a, Tourism Department in a enkawlna senso an tum thung dawn a ni.

Vawiin chawhma dar 11:00 a Sihhmui Community Hall-a he programme puala inkhawmna tawite buatsaih ah khuallian Pu Biakthanmawia Pautu, Director, Tourism Department chuan Mizoram kawngpui pawimawh leh lun ber pakhat "Sihhmui-Lengpui Airport Road" chu mawi tak leh nalh taka chei a, zin veivakte tan pawh a hmuh nuam leh manhla taka siam hi he thingphun hian a tum ber pakhat a ni tiin kan ram neihchhun hi Mizoram ani tih hre reng a zin veivak leh a bul hnaia chengte pawhin duat taka thingphunte lo enkawlpui turin a sawm nghal bawk.

Thingphun leh enkawlzui hna thawk turin Aizawl khawchhunga zirna in hrang hrang a NSS Unit 10 - Pachhunga University College, Govt. Hrangbana College, Govt. Aizawl College, Govt. Zirtiri Residential Science College, Govt. Aizawl North College, Govt. Mizo Higher Secondary School, Mizoram Institute of Comprehensive Education (MICE), Govt. K.M. Higher Secondary School, Synod Higher Secondary School leh Govt. J.L. Higher Secondary School- te ruat an ni.

June ni 30, 2018 pawh khan he project hnuaiah leh SAGY (MP Model Village) hmalakna hnuaiah Lengte peng atanga Lengpui Airport thleng YMA Branch, Lengpui ten Saron kung 100 an lo phawn tawh bawk a ni.