World Population Fortnight 2015 denchhena Aizawl East District in vawiina Health Mela, Sihphir Community Hall a neih chu Pu R. Lalrinawma Dy. Speaker, Mizoram Legislative Assembly in a hmanpui.
Khuallian Pu R. Lalrinawma chuan ama bial ngei te zinga mi Sihphir Model Village atana thlan a ni chu lawmawm a tih thu leh kut hnathawh rah sengtu hlawhtling tak Iskut ah phei chuan model village ni tawh an nih thu sawiin Hriselna leh Faina ah pawh hmahruaitu leh Model Village ni turin khaw taima an lo nih tawh na vawng nung zel a, Health Department te hmalakna tawiawm zel turin Sihphir khua chu a sawm nghal a ni.
World Population Day Kum 2015 thupui (theme ) “Chhungkaw hlim nan leh hrisel nan kum thum danah fa nei ang che“ tih thlan a nih thu Khuallian chuan sawiin Chief Medical Officer, Aizawl East District bik ah vawiin thlenga chhut dan chuan mihring 2,64,731(Nuai hnih sing ruk sangli za sarih leh sawmthum pakhat) an awm anga chhut niin hmeichhia 1000 zelah mipa 994 awm anga chhut in hmeichhia aiin mipa an tlem zawk a ni a ti a, nu leh naupang hriselna leh dam khawchhuahna atan Family Planning fel neih hi a pawimawh em em a, nu in hrisel taka fa nei thei tur in a taksa in chakna a khawl khawm nan kum thum dan tala fa a neih a pawimawh in hetianga nu leh a fa hriselna ngaihtuah chunga chhungkua kan ruahman chuan tunlaia kan ngaihpawimawh IMR, MMR te hi a lo hniam sawt ang a, state changkang tak kan lo nih theih ngei a beisei thu a sawi.
Family Planning han tih hian nau pai lo tura insiam ngawr ngawr a ni lova, chhangkhat tawk leh enkawl zawh tawka fa neih te, hriselna atan te a ni tiin Pu R. Lalrinawma chuan Health Mela chu hlawkpuia tangkai taka hmang tura duhsakna hlan in Ni 27th July -11th August,2015 a intensified Diarrhoea Control Fortnight la hman tur ah pawh thahnem ngai taka tawiawm tur in thawktu leh bial mipui te a sawm nghal a ni.
Dr. C. Lalzepuii,.CMO Aizawl East District in a kaihhruai Health Mela neihah hian Dr. Chawngthanchhunga, SMO in Power Point Presentation hmanga entir in Family Planning Methods chungchang a sawifiah a, sawiho na in chhunzawm nghal a ni. Dr. H. Saithanliana, DFW & Mo in lawmthu sawi in hun a khar a, Hemi hnu hian PHC Sihphir ah Nau hnute pek dan, chhangkhatna hman dan hrang hrang leh chhungkaw hriselna atana hriat tur pawimawh te practical a zirho na leh sawiho na in hun hman a ni.
