Champhai District Child Protection Office buatsaihin vawiin khan I&PR Conference Hall, CHANEM building-ah naupangte dikna leh chanvo humhalhna leh an chunga pawikhawihtute hremna dan chungchangah Champhaia District chhunga thuthar thehdarhtute tan training buatsaih a ni.
Training hi hi Pi R. Lalrinchhani, DCPO chuan a kaihhruai a, Pi Vanlalhruaii, PO (NIC) chuan Juvenile Justice Act 2006 chungchangah zirtirna pe in, he dan hi naupang tana tha ber tura duan a, an dikna chanvo humhalh chunga rorelna dik tak pek theihna tur a nih thu sawiin, naupangin pawikhawihin thil sual lo ti tawh mah se nunphung pangngai zawh thei leh tura chher chhoh chu Juvenile Justice Act-in a tum ber a ni, a ti a. Dan hriat loh avanga thil tihsual chu thiam channa a nih loh avangin, kan thil tih tur reng reng chu kan hrechiangin, danin min phalsak chin pawh kan hriat a tul a, tunah hian JJ Act hi siamthat tura ruahman mek niin a hremna pawh na zawka siam tura ruahman a ni, a ti bawk.
Training-ah hian Pi Lalsiammawii, Legal cum Probation Officer chuan thla hmasa atanga hman tan hur sualna lam hawia naupang khuaikhem hremna dan, Protection of Children from Sexual Offences (POCSO) Act, 2012 ah zirtirna pe in, he dan hi naupangte laka mipat hmeichhiatna lam hawi zawng thubuai rang taka ngaihtuah theihna tura siam niin, thubuai lut reng reng chu kum khat chhunga chinfel tur a nih thu a sawi a. Kan hnam nunphungah fiamthu a mipat hmeichhiatna lam rawngkai a kum tlinglo khawih leh chhaih kan ching thin hi he dan hnuaiah hi chuan thubuaia lak theih niin, fimkhur a tul hle a. He dan hnuaia kum tling lo te hming media-a tarlangte chu lung in tan thlenga hrem theih a ni tih te tarlan a ni.
Pu Jerry P. Vanlalrinchhana hnen atangin IT Act chungchangah zirtirna ngaihthlak niin, media leh social media-a pawisawi theihna thu leh thlalak thehdarhtute hrem theihna hrang hrang a tarlang bawk.
Juvenile Justice Act hnuaiah hian naupang enkawltu emaw, naupang chunga mawhphurhna leh thuneihna neitu reng rengin naupang taksa leh rilru tina zawngin naupang chu hlamchhiah a, ngaihthah leh hleihluak taka kutthlak emaw, naupang chu chutiang dinhmun derthawnga dintirtu leh tuartirtu chu lung in tantir emaw pawisa chawitira hrem theih a ni a. Zu, ruihhlo leh hnima ruih chi reng reng chu naupangte kutah a zuartuten an hralh tur a nih loh bakah, media-a naupang humhim ngai leh dan kalha chete hming emaw, an nihna tilang tuhei tura chanchin ziah emaw, an thlalak chhuah chu he dan hmang hian cheng 25,000 thlenga chawitira hrem theih an ni.
POCSO Act hnuaiah hian pawngsual bakah mipat hmeichhiatna lam hawi zawnga inkhawih emaw, inchhaih te, thusawi, zaizira lantir leh a dangte pawh huam telin, pawikhawih dan a zirin kum 7 atanga damchhung lung in tan thlengin pawikhawihtute chu hrem theih an ni bawk.
