NLUP hmalakna hnuaia a vawi khatna atan leilet buh kara sangha khawi tur chu NLUP Implementing Board Chairman Pu JH Rothuama chuan Champhai leilet neitu thenkhat hnenah sangha chi sem in , leiletah sangcha chi a chhuah. Sangha chi semna hun, Zotlanga neih hi Champhai DFDO office in buatsaihin, NIB Secretary Pu James Lalrinchhana'n hun hi a kaihruai a ni.

Pu JH Rothuama chuan Mizoram hi sangha ah intodelh tura a duh thu sawiin, vawiina leilet sangha chi chhuah hi chumi kawnga ke penna ni zel se a tih thu a sawi a. Buh chin kara sangha khawi chu a hautak loh zawk thu leh a thatna leh hlawkna tam tak ram dangah pawh hmuh tawh a nih thu sawiin, Mizoramah pawh hlawk tham a khawi theih a nih nan tun hi mimal pawisa sen ngai lovin Sorkarin a enchhin atan hma la in, Pilot Project hi kalpui a nih thu a sawi a. Champhai bakah Serchhip District-ah leilet sangha chi hi chhuah a nih tur thu a sawi a. NIB Secretary chuan hlawkpui ngei tura an beisei avangin a dawngtute pawhin uluk taka an enkawl zui a beisei thu a sawi bawk.

Champhai DC Pu H. Lalengmawia pawhin thu sawiin, vawiin a a thlawna malsawmna dawngtute chuan theihtawp chhuaha an beih ngei a duh thu leh, mimalin kan tih theih theuh te ti zel a, taima taka bei turin kalkhawmte chu a chah a ni.

Vawiin hunah hian Fisheries Department Joint Director leh NLUP Fisheries Nodal Officer ni bawk  Pu SP Singh chuan technical report pe in, sangha khawitu turte tan hriat tur pawimawh te a sawi a. Buh leh sangha khawi chu "integrated culture" niin, a pahnih ve ve tan a that vek thu a sawi a. Champhai DFDO Pu Lalthanzauva'n hun tawp a siam a ni.

NIB Chairman hi Secretary leh Fisheries Nodal Officer bakah hian NIB Chief Media Officer Pu David Thangliana leh NIB a engineer ten an tawiawm a. Vawiin programme-ah hian Champhai Addl SP leh NLUP Line Department hrang hranga hotute an tel bawk a ni.

NIB Chairman Pu JH Rothuama hian nimin (22.7.2015) khan Champhai lo thlengin, Circuit House Conference Hall-ah NLUP Line Department hotute nen Champhai DC hovin inkawmhona hun a hmang a. NLUP line department te tha taka an thawh zel a duhsak thu sawiin, NLUP avanga state pawn leh ram dang atang pawha thawhpuitu leh thawhpui duh an awm zel thu a sawi a. Chutihrual chuan department lam leh beneficiary ten thawhpui tlak kan nih theih nan kan mawhphurhna kan hriat tlan a ngai a ni, tiin Nodal Department te chu thawhhona tha tak an neih zel a beisei thu a sawi bawk.