Vawiin chawhma khan Muthi YMA Run hawnna hun hman a ni a, he hunah hian Dy. Speaker Pu R Lalrinawma, Bialtu MLA ni bawk chu Khuallian niin Muthi khawtlang hruaitute, mipui leh Zirlai thahnem takin he hun hi an telpui.

Dy.Speaker Pu R.Larinawma chuan,”Muthi a hmasawnna a thlen theihna tura Kawng tha siam nan a Muthi Khawtlang inpekna hi a ropui hle a, Sawrkar hmalaknate ngaihlua, Khawtlang hruaitute bakah zirlai thahnem tak in lokal khawm hi ka lawm takzet a ni,” a ti a, Sawrkar hmalakna zara mi taima, thawkrim leh tihtakzeta hmasawn tumte intodelh leh intundin nan NLUP leh NEDP kalpui mek a nih thu a tarlang bawk. Pu R.Lalrinawma chuan Zirlaite chu ruihhlo laka fihlim tur leh ram tana mi tangkai leh hmantlak ni turin a fuih a, Model Village a thlan an nih angin Faina leh Thianghlimna kawnga khaw dangte entawntlak ni turin a chah bawk.

Muthi VCP Pu MS Dawngliana chuan thusawiin Zirlaite chu thing leh Mau, Ramngaw leh Nungchate humhalhna kawngah tan la thar turin a chah a, khawtlang faina leh thianghlimna kawng hi mitin mawhphurna a nih thu tarlangin faina kawnga hmasawn zel tum turin kalkhawmte a sawm  bawk.

Muthi YMA Run hi NEDP leh MLA fund hmanga sak niin, May 2018 khan sak tan a ni a, cheng Sing sarih sengin July 2018 khan sak zawh a ni. YMA Run hawnna hun hi Pu Lalhmingthanga Vice president Muthi branch YMA in kaihruaiin zirlai naupang atangin Zai leh lamte entir a ni bawk.