Vawiin hian Hrangturzo bialtu MLA Pi Vanlalawmpuii Chawngthu chuan MLA Fund hmanga sak Bungtlang Bazar Branch YMA Building thar a hawng.

A hawnna inkhawmah Pi Vanlalawmpuii Chawngthu chuan, Bungtlang Bazar Branch YMA ten hun rei tak atanga an lo buaipui tawh YMA building tha tak an nei ta chu a lawmpui thu a sawi a. Bialtu MLA hnena dilna thlentu ni ringawt lova, a taka thawktu an ni chu chhuanawm a tih thu a sawi. Minister te hi intilal tur ringawt nilovin bial tan, ram leh hnam tana thawk tur an ni angin, YMA hruaitute pawh inti hruaitu ringawt lova midang tana thawktu an nih a tul thu a sawi a ni. YMA chu a din tirh atanga vawiin thlenga tha taka a kal theih chhan chu mi inpe te vang ani a, mimalin kan tih theih loh hi YMA chuan a ti theih thin avangin thawh hona tha tak nei zel turin Bungtlang mipuite a chah a ni. YMA in ruihhlo do kawngah te, mipat hmeichhiat hman khawlohna laka fihlim tura inzirtirna kawngahte leh kan ram lui dung leh ram ngaw kan humhalh kawngahte leh kawng danga sawrkar a thawhpuina te chu lawmawm a tih thu a sawi bawk.  

He hunah hian Pu Lalrinfela Sailo, Secretary, Building Sub-Committee chuan YMA Building sak dan report a pe a, kum 2013 khan bialtu MLA Pu Lalthansanga hnen atangin Rs. 20,000 an dawn atanga bul tanin 2016 ah Pi Vanlalawmpuii Chawngthu, bialtu MLA in Rs. 80,000 a pekin chhunzawm leh a ni a, YMA Library building an tihralna pawisa Rs. 1,22,000 thawhbelhin ni 3 August, 2018 hian luah theihin peih fel a lo ni ta a. A sakna atana an sen zawng zawng hi Rs. 2,42,000 niin, a building len zawng hi, a dung 30 ft, a vang 15 ft ani a, a ban leh a beam te RCC hmanga sak a ni.

Building hawnna inkhawm hi Pu R. Laltanpuia, President Bazar Branch YMA in a kaihruai a, Pu R. Zothanmawia, Branch Secretary hnen atangin report ngaihtlak a ni a, Pu R. Sanghmingthanga, President Sub-Headquarters YMA Serchhip pawhin thusawina hun a hmang bawk.

Bungtlang Bazar Branch YMA hi kum 2015 a din tan niin tunah hian member 455 an awm mek ani.