Vawiin hian Project HIMNA – Serchhip Against Drugs, Alcohol & Tobacco (Project HIMNA- SADAT) Serchhip District Coordination & Implementation Committee te chu an Chairman Pi Sangchhin Chinzah, Bawrhsap hovin an thukhawm a, he Project hnuaia Serchhip District in kumin atana Fund an dawn Rs. 5 Lakh hmanga hmalak dan tur Action Plan an duang.

Pi Sangchhin Chinzah chuan, zuk leh hmuam uar thin tak hnam kan ni a, kan tu leh fa, vawiina naupang duhawm tak takte pawhin he chin thalo an rawn chin chhoh ve mai theihna remchang hi a la tam hle. Chuvangin kan tu kan fate, naupang mai an nih lai atanga a that loh zia leh a pawizia kan inhrilhhriat a, nun kawng dik zawk kan zirtir hma chuan nasa takin a sawt dawn a. Chutiang bawkin ruihhlo thuah pawh hma taka kan inzirtira, tha thlah lova kan umzui zel chuan a tangkai dawn a ni, tiin Project HIMNA-SADAT pawimawh zia a sawi a. Kan Action Plan siamte a taka kalpui kawngah member ten mawhphurhna pawimawh tak tak an neih dawn avangin tha taka hlen thei tura lo inbuatsaih hmasak a tul thu a tarlang bawk.

He Project in a tum chu naupang, Middle School atanga Higher Secondary School zirlai naupang te zuk hmuam leh Drugs laka an him theihna tura an nun kawng hma tak atanga kaihhruai (early intervention) a ni a. Kumin atan hian he Project kalpui nan hian Serchhip District ah School 30 thlan chhuah tur an ni. Vawiina meeting hian hmalakna tur school te a thlang a, school tlawh kual tur team te siamin, zirtirtute training petu tur mithiam te, Campaign leh Awareness hrang hrang kalpui dan tur te leh a neih hun tur tlangpui te a duang a ni.