Vawiin khan Dy.Speaker, bialtu MLA ni bawk Pu R.Lalrinawma’n Zemabawk North Basketball Court a hawng.

Khuallian chuan Zemabawk North Basketball Court peihfel ani chu lawmawm a tih thu sawiin thalaiten tangkai taka chhawr turin a duh thu a sawi bawk. Mi tumruh leh mahni inthunun mi tan chuan sport lamah sang tak a thlen theih thu tarlangin kalkhawm thalaite chu Mizoram ti hmingtha tu nih tum tur in a chah a ni.

Infiamna lamah Mizoram Sawrkar hmalakna tamtak zinga thenkhat te tarlangin Sport Infrastructure lamah hmasawnna tamtak hmuh tur a awm thu a sawi a, hun rei tak sem tawhloh Sport Incentive Cash Award chu 2008 atanga sem leh a nih thu pawh a tarlang tel bawk a ni. Sawrkar hmalakna chu a hlawhtlinna kawng tamtak ah a lang chho zel a ni tiin National Level a Sport Discipline hrang hrang ah Mizo thalaiten Medal thahnem tak an rawn hawn tawh thu a tarlang tel bawk a ni.

Pu Lalthanpuia Khawlhring, Vice Chairman, Local Council, Zemabawk North chuan Basketball Court chungchangah report pe in Court chu MLA fund, MP(RS) fund leh Mizoram State Sports Council (MSSC) fund te thawhkhawm cheng nuai 15 senga siam a nih thu a tarlang a ni. Hawnna inkhawm hi Pu C.Laltlanthanga, Secretary, Mizoram State Sports Council (MSSC) chu khualzahawm niin a telpui a, Pu Zohruailiana, Chairman Local Council, Zemabawk North in a kaihruai a ni. Pastor KC Vanlalduha, Presbyterian Church, Zemabawk chuan Court chu Pathain hnenah hlanin Pu F.Lalramzauva, Member, Local Council in lawmthu sawina in hun a khar a ni.