Vawiin chawhnu khan Environrment & Forests Minister Pu Lalrinmawia Ralte kaihhruaiin a pisaah Sub-Committee on Fire Prevention chuan Fire Prevention Week 2017 hman dan tur an rel.

Meeting hian Fire Prevention Week chu February ni 6 atanga ni 11 chhungin neih ni se an ti a, hawnna inkhawm chu February ni 6-ah Lal Thanhawla Auditorium-ah neih tha an ti. Kum dang ang bawkin kumin hian lo hal theih ni hnuhnung ber atan March ni 15 an ruat a. Kum kalta a hma an lo lak tawh dante thlir letin, kangmei ven kawnga District tina hmalakna tha thawkhawt in an hria. Kum 2015 ah lo hal hun bituk zawm lo khua 206 an awm laiin kum 2016 ah chuan khaw 98 chauh an ni ta a. February atanga May 2015 ah ram kang hmun 2468 ah a awm laiin Forest Survey of India tarlan danin kuminah hian hmun 1626 ah a awm a, ram kang zau zawng hi 4547.45 Ha a ni.

Kum dang ang bawkin Fire Prevention Week 2017-ah District leh Village Level-a Fire Prevention Award sem leh tha an ti a. Monitoring & Evaluation ti tur atan tlawmngai pawl-SENVA, CYMA, MUP, ASEP, NSS, STAM, AMFU leh Green Mizoram Network te ruat an ni. Awareness Campaign chungchang sawi hovin kum dang aia uar zawka kalpui tha an ti a. Mipuiten kangmei chungchanga kan lo fimkhur zawk nan TV-ah te a remchan dan anga sawihona hun hman, electronic leh print media kaltlanga a zau thei ang bera fire prevention chungchang puanzar, College hrang hrangah NSS te huaihawta seminar neih, District tin DC ten video conferencing hmanga mipui zirtirna pek, Group YMA khawmpui kaltlanga Mizoram hmun hrang hranga zau zawka puandarh te an rawt a. Fire Prevention Week 2017 pual hian thupui thlan bik (theme) neih ni se an ti bawk.

Sub-Committee on Fire Prevention thurel leh rawtna hrang hrangte hi Chief Minister kaihhruai State Level Fire Prevention Committee -ah thlir ho leh a ni ang.

Sub-Committee-ah hian Principal Chief Conservator of Forests (PCCF) Pu Lalram Thanga, Environment & Forests Department hotute, Line Department hrang hrang bakah tlawmngai pawl (NGO) aiawh te an tel a ni.