Vawiin khan langtlang zawka Court kalpui theihna tur leh awlsam zawka thubuai ngaihtuah tawh leh kallai mek thlen chin hriat theihna tur atana hmalakna e-Court project chu Gauhati High Court Judge, Justice Michael Zothankhuma chuan District Court Buidling-ah mipui hman theih turin a hawng a. e-Court Project hnuaiah hian Kiosk leh Individual Court Public Information Display system duan a ni.

Justice Michael Zothankhuma chuan tunlai information & technology thangchho zelah Court-in he thiamna hi hmang tangkaiin hma a sawn ve zel a ni, a ti a. Paperless Court nei turin hmasawnna a kal mek zel a ni a ti. Vawiin a Kiosk khawl hawn tak hi Court dawrtu mipui leh ukil te tan tangkai tak anih a beisei thu sawiin, dimdawi taka hmanga turin a chah a ni.

e-Court project atan hian vaibelchhe 6 ruahman a ni a. Kiosk khawl hmang hian Aizawl District Court hnuaia Judge awm zawng zawng ten Court-a thubuai awm mek te, a thlen chin te, ukil ding te leh thubuai ngaihtuah hun tur te a en theih dawn a, kiosk khawl hi pariat (8) lei a ni. Court building first floor-ah dah niin mahniin thubuai chungchang hmehchhuah a en mai theih a ni. Individual Court Public Information Display hi Mizoram tan bika siam a ni a, court pawn tinah dah niin thubuai ngaihtuah tur tarlanna a ni a. Court chhunga luh kher ngai lovin thubuai ngaihtuah leh mipuite hriattur tarlan thin a ni dawn a ni. Heng bakah hian e-Court project atan hian district tinah hmanraw pawimawh tak tak lei a ni bawk.

Mizoram Bar Association Vice President Pu L.H Lianhrima Sr. Advocate chuan kalkhawmte lawmna thu a sawi a. Law & Judicial Dept. Secretary Pi Marly Vankung atangin thusawi ngaihthlak a ni a. Khawl hman dan tur entirna hun hman a ni a. NIELIT Senior Technical Officer Pu Lalrempuia atangin technical report ngaihthlak a ni a. District & Sessions Judge Pu Joel Joseph Denga chuan lawmthu sawina in hun a khar a ni.