Vawiin hian E. Lungdara Thangburha Hall ah E. Lungdar Block chhunga CM Rural Housing Scheme under NEDP 2016- 17 hnuaia in sak tanpuina dawngtute hnenah 1st instalment tanpuina sem ani a. Pi Vanlalawmpuii Chawngthu, bialtu MLA leh Minister of State ni bawk chuan khuallian niin a hman pui.

Khuallian Pi Vanlalawmpuii Chawngthu chuan, Chief Minister Rural Housing Scheme under NEDP 2016-17:  kuminah a bial chhunga chhungkaw 38 laiin an dawng tur chu lawmawm a tih thu sawiin Chief Minister Pu Lalthanhawla chungah lawmthu a sawi a. Mizoram sawrkarin mi harsa zawkte a ngaihtuah zia leh an hnen thleng phak ngei hmalakna te a kalpui thin avangin Mizote kan vannei hle ani, a ti. Thingtlanga mi harsa zawkte tan mai nilovin khawpuia mi harsate tan pawh in engemawzat sak tawh ani a. Tunah pawh khawpui hrang hranga in neilote in sak tanpuina hi kalpui tuma hmalak chhoh mek zel ani, a ti bawk. Minister hian, in leh lo din chauh nilovin kan hmuh leh hriat angin kan eizawnna lama kan lo dinngheh deuh deuh theih nan NLUP te sem ani a, NLUP atanga thawh rem chang lo mamawh intawm chi hrang hrang thawhna tur NEDP te siam zui zel niin he sawrkar hian a mipuite tan a thawk nasa hle ani. Chutihlaiin heng tanpuinate dawng tlak, duhsak tlak, mi taima leh tumruh ni tura mipuite kan inbuatsaih sauh sauh erawh a tul hle thung. Tin, Khawtlang rorelna tha, thawh hona tha, party indaidanna awm lova lungrual taka rorelna te, mahni inhaivur duhna rilru tel lo hmalakna te pawh a pawimawh em em ani tiin kal khawmte a chah a. Khua leh tui tha,  khawtlang inlungrual, sawrkar hmalakna tinreng tha taka lo thawhpui thin mi nih tum tur leh vawiina CM Rural Housing Scheme dawngtute pawh malsawmna an dawn te tha taka lo hmang ngei turin duhsakna a hlan ani. Thu a sawi zawh hian he tanpuina dawng tura thlante hnenah 1st Instalment hi Cheque in a hlan nghal ani.

He hun kaihruaitu Pi Dorothy Muansangi, MCS, BDO chuan E. Lungdar Block chhungah CM Rural Housing Scheme sawrkarin a kalpui chu lawmawm a tih thu a sawi a. Block chhunga chenna in din thar ngai mi tam tak tan malsawmna ropui tak a tling ani. A dawngtuten tha taka an tanpuina dawnte an hman ka beisei a, a umzui hna pawh chak taka kalpui ngei kan tum dawn a ni, tiin a dawngtute dik taka lo hmang ngei turin a chah ani.

He hunah hian Nl. Lalrotluangi, Inspector of Statistics & dealing staff, BDO office chuan technical report a pe a. E. Lungdar Block chhungah hian khaw 12 awmin heng khuaah hian CM Rural Housing Scheme 2016-17 dawng tur hi Gram Sabha in an thlang a. Chung Gram Sabha in an thlante chu Project Director, DRDA ten an enfiah leh vek hnuah a dawng turin Block chhunga BPL chhungkaw 38 te chu thlan fel an ni ta ani. Tanpuina hi avaiin Rs. 50000 pek tur niin tum thum (three instalment) a pek chhuah tur ani a. A tum khatnaah 30% chu chu Rs. 15000 an bank account ah thun sak an ni ang a, hei hi a ruhrel din nana hman tur ani. Chumi hnuah a ruhrel thlalak nen form awmsa hmangi  2nd Instalment 40% chu chu Rs. 20000 an la chhuak leh ang a. A chung leh a bang sak nan an hmang thung ang. Chung hnate an thawh zawhah final Instalment 30 % chu chu Rs. 15000 an lachhuak leh dawn a ni.

Vawiina CM Rural Housing Scheme tanpuina semnaah hian Block chhunga village council hrang hrangte, tanpuina dawng tura thlan mi 38 te, E. Lungdar khawtlang hruaitute an tel ani.