YMA General Conference 71-na in ‘hlo tur leh rannung thahna hlo anihna tur ang taka hman leh hman fimkhur taka hman nise’ a tih chungchanga alo rel tawh bawhzuiin vawiin khan Agriculture Minister Pu KS Thanga chu a officeah CYMA hruaituten an kawm.
CYMA President Pu Vanlalruata chuan hlo tur chu anihna ang tak leh fimkhur taka hman anih theihnan kut hnathawktute nasa taka zirtir tul a tihthu a sawi a. Agriculture deparrtment nen ruahmanna siam a hun lokal turah thawhhona tha tak neih a beiseiawm avangin lawmthu a sawi a ni.
Pu KS Thanga chuan Agriculture departmentin hlo tur hman dan kawngah kut hnathawktute zirtirna kalpui mek chu Doordarshan ah te program neih thin anih thu sawiin, hemi bakah hian zau zawka inzirtirna TV leh Chanchinbu kaltlanga neih tul a tihthu a tarlang a. Hlo tur hman dan kawngah YMA ten thahnem an ngaihna leh an vei chu lawmawm a tih thu a sawi a. CYMA te nen hemi kawngah hian Agriculture department nen zau zawka thawhhona ruahman nise tih a sawi bawk a ni.
Agriculture department hotute chuan tunah hian Mizoram pumah insecticides dealer mi 33 an awm mek tih an sawi a. District tinah Inspector pawh dah vek anih bawk thu an ti a.. Department hotute chuan Chemical fertilizer hi tur anih loh thu sawiin, fimkhur taka a hman dan dik tak nen chauh hman tur a ni an ti a. India ram pum huap ang phei chuan Mizoram chu chemical fertilizer hmang ve manglo ang a ni an ti.
Inkawmhonaah hian kut hnathawktute hmakhaw ngai chung zela thawhho nise tiin, awareness programme te district tinah buatsaih thin nise an ti a ni.
Minister hi Agriculture hotuten an tawiawm a ni.
