Kar kalta khan Pu R.L. Pianmawia, Deputy Chief Whip, Govt. of Mizoram chuan a bial chhung khaw engemaw zat a tlawh a. Ni 7.12.2011 zing dar 10:00 khan E. Phaileng Govt. High School Silver Jubilee ropui taka lawm a ni a. Pu R.L. Pianmawia bialtu MLA ni bawk chu khuallian niin a hmanpui.

Khuallian chuan kawng bum boh leh harsa tak paltlanga, mi inpe te avanga lo ding E. Phaileng Govt. High School in Silver Jubilee a lo thlen ta chu lawmawm a ti a. Zirlaiten hma an sawn zel theih nan nu leh pa ten mawhphurhna tak tak kan nei tih hre thar leh ila. Zirtirtute pawhin rintlaka hna an thawh a ngai a. Nu leh pa ten an fate an rohlu ber in kutah an rawn dah a ni tih hriain, mi puitling ni tura chherchhuak ngei turin a fuih a. Zirlaite pawhin zirlai an ni tih in hria a, tih takzet a an zir a ngai a. Nu leh pa te thlazar hnuaiah duh thal a zir thei te an han hlawhchham tlat mai hi chu hriatthiam a har thin a ni a ti. Kan ram tan tan i la sauh sauh ang u tiin uar takin a fuih a ni.

Sorkarin duhsak taka hmarlam tlangdung tana, a hmalakna te sawi phahin, Darlawn tlangdung phei zawng zawngte tana rin theih tur, Tuivawl lui tui Kepran khawtlanga pump chhohna tur siam peih a ni tawh a, a hlawhtlin theih nan nasa takin kan Chief Minister in min nawr pui a ni a ti bawk.

E.Phaileng Govt. High School ah hian zirtirtu 6 leh zirlai 50 vel an awm a, Inkhawm hi Pu Rotluanga, Headmaster in a kaihruai a, tlai ah Jubilee ruai khawtlangin an theh a ni.