Vawiin khan Agriculture Conference Hall-ah Loneitute tana a bik taka siam Identity Card chu Pu H. Liansailova, Agriculture Minister chuan Aizawl District-a NLUP hnuaia Agriculture thlangtute hnenah a pe chhuak.

Agriculture Department-in loneitute tana he Identity Card an buatsaih semchhuahna programme Pu T.V. Fambawl, Agriculture Secretary kaihhruaiah hian Aizawl District chhunga khaw hrang hrang Kepran, Sesawng, Thingsulthliah, Sairang, Sihphir, Muthi, Sialsuk leh Melriat atang te in NLUP hnuaia leilet leh terrace siam thlangtute an kal khawm a. Loneitute hnenah hian khuallian chuan loneitute Card siam hi loneituten hamthatna chi hrang hrang an hmuh theihna tura ruahman a ni tih sawiin, he Card hmang hian chhinchhiah an ni dawn a, Agriculture Department hnuaia tanpuina awm thei ang ang pawh he Card hmang hian an dil theih tur thu a hriattir nghal bawk.

Loneitute chhinchhiahna Identity Card rual hian NLUP Beneficiary Card pawh semchhuah nghal a ni a, he Card-ah hian NLUP hnuaia tanpuina dawngtute hming leh address bakah an trade thlan hming te, an sum dawn zat te, NLUP hnuaiah tanpuina vawi engzat nge an dawn tawh tih te uluk taka chhinchhiah a ni dawn a, a enkawltu Department Officer-ten hming an sign hnan thlap zel dawn a ni.

Hetianga loneitute tana buatsaih Identity Card leh Beneficiary Card hi District dangah pawh tun kar chhung hian semchhuah vek tum a ni.