No.6816/2020-2021

Dated Serchhip, the 9th December, 2020: Vawiin hian Serchhip DC Meeting Hall ah Special Summary Revision of Electoral Roll, 2021 neih meka Aizawl, Serchhip leh Hnahthial district Observer tura Election Commission of India in a ruat Pu Vanlalngaihsaka, IAS, Secretary to the Government of Mizoram hovin Roll Revision neih mek chungchang thlir hona neih a ni.

Meeting ah hian Pu Vanlalngaihsaka chuan, Election Commission of India chuan, khua leh tui dik tak, kum 18 tlingte chu E-Roll ah chuang vek se a duh a, chutihrualin boral tawh leh paih ngai chi dangte pawh fel taka paiha, then thianghlim zel ni se a duh bawk a. Kum tin Roll Revision a buatsaih thin. Kuminah pawh revision fel fai tak neih ngei tumin kan bei tlang ang a, a hun takah engkim peih fel zel kan tum dawn nia, tiin Revision hnathawktute a fuih a. Tin, inthlan te, electoral roll te hi a taka chhawr tangkaitu chu Political Party te an ni ber a, Party aiawhte tel lo chuan eng mah a kalpui hleih theih loh a ni. Hei vang hian Party tin te thawhpuiah kan sawm nawn leh cheu a, Booth Level Agent pawh kokim taka inruat vek turin ka ngen cheu ni, tiin party aiawh kalkhawm te thawhpuina a ngen bawk. Observer chuan, khua leh tui ten Roll-a kan hming chuan tir ngei hi kan chanvo a ni tih hrereng ila, chutihrualin inthlan hun a lo thlena vote thlak ngei pawh kan mawhphurhna a ni tih kan hriat tel a tul hle a ti a, khua leh tui dik tak nilote Roll a thun lo tura fimkhur turin thawktute a chah bawk a ni.

He thutkhawmna ah hian Pu Vanlalhmachhuana, MCS, EO chuan Roll Revision kalpui mek dinhmun tlangpui report a, Pre Revision  Activities ah New Serchhip Area ah Polling station dah belh a nih thu te, Service Voters chungchangte leh revision kal meka dinhmun tlangpuite a tarlang a, tunah hian Roll a luh thar dilna lut tawh zat chu 244 a ni a a la luh belh zel dawn nia hriat a ni.

Pu Kumar Abhishek, IAS, DEO pawhin thusawiin, Observer Pu Vanlalngaihsaka’n Revision thawktute leh Party aiawhte nena inhmuhkhawmna hun tha tak a buatsaih sak avangin lawmthu  a hrilh a, E roll fel fai leh thianghlim tak a awm theih nan a tul apiang thawh zel an tum thu a lo hrilh a ni.

Meeting ah hian Thenzawl ERO Pu Kulothungan, IAS, Serchhip ERO Pi C. Lalduhzuali, MCS, Pu Lalmuansanga Ralte, MCS, Addl DC, Dr. Manasia Khaimeichho, AERO Serchhip te leh Political Party hrang hrang aiawhte an tel a ni.