No.6815/2020-2021

Aizawl, the 9th December 2020 : Vawiin khan ni hnih awh tur Photography Workshop, Information & Public Relations Department leh Mizo Photographers’ Society tangkawpte buatsaih chu I & PR Director Pi Lallianpuii’n I & PR Auditorium ah a hawng.

Pi Lallianpuii chuan thla lak photography thiam tur chuan talent neih ve a ngai nia a hriat thu sawiin photography hi art mawi leh ril tak a ni a, thlalak hian thu leh hla tam tak a funkhawm a, ngaihtuahna ril, thu-a sawi hleih theih loh tam tak a inphum a, hengte avang hian thlalak mawi leh ril chuan khawvel a dengchhuak thin fo thin a ni, a ti a. Art anih mai bakah thlalak hi record vawngtu thil tangkai tak a ni tiin thil thleng mek leh thleng tawhte, ram leh hnam chanchin te thlalak hmangin zau takin a puanchhuah theih a, chuvangin in thlalak hlutna hi engtikmah a bo thei dawn lo a ni tiin Director chuan a sawi.

I & PR Director chuan  I & PR Department chu Mizoram Sawrkara Department upa berte zinga ami a ni tiin Digital photography chhuah hma daih tawhin Department chu photography lamah a theih angin angin hma la in Mizoram chanchin te kan lo document tawhin ram pawnah Mizoram chanchin thlalak hmangin thehdarh thin a. Chuvangin photography hmasawnna atan a sulsultu hmasa niin Department hi a ngaih theih a ni, a ti a. MPS leh Department-in thawhhona tha tak an neih thusawiin an kutchhuak te chu Mizoram chanchin pholanna calendar leh publication ah te thawh zel turin photographer kalkhawmte chu a sawm a. Workshop chu hlawk taka hmang tura chahin an thiamna neihsa an tihpun ngei a beisei tih pawh a sawi bawk a ni.

Workshop hawnna hi MPS Vice President Pu Armand Malsawmdawngzela’n kaihruaiin MPS Secretary HT Hnamtinkhuma’n report tawi a sawi a. Pu C. Lalnunkima, Joint Director; Pi K. Vanlalsangi Deputy Director leh Nodal Officer, Visual Arts leh MPS hruaitu dangte leh MPS member te an tel bawk a ni.

He Workshop ah hian hnih chhungin Photography chungchang leh techniques te zirho a ni dawn bakah sawihona hunte neih a ni dawn bawk a ni. Sawrkar SOP zam ang thalpa Worskhop hi buatsaih niin MPS member 30 bawr ciah an tel a ni.