No.6814/2020-2021

Aizawl,  9th December, 2020 : Tukin zing khan Govt. Primary School Zonuam-a  Multipurpose Recreational Center & Community Hall sakna tur lungphum hmasa ber chu UD&PA Department enkawltu Minister Pu Tawnluia Dy.Chief Minister-in a phum a. Hemi puala inkhawm hi Pu T.J.Lalnuntluanga Minister of State; Pu Zothantluanga Bialtu MLA; Pu Rualchhina Former Minister; Pu T.C. Pachhunga Vice Chairman S&YS and Tourism Development Board ten an telpui a ni.

Multipurpose Recreational Centre & Community Hall hi State Plan Fund(2018-19) atangin cheng nuai 500 senga sak tur a ni a. A building hi chhawng 4 a sak tura duan niin a chhawng hnuai ber chu lirthei, car 20 leh two-wheeler eng emaw zat dah theihna tura ruahman a ni a. Chhawng khat na chu school atan class room te, office leh choka awmna tura duan niin a chhawng hnihna chu conference hall leh library atan ruahman a ni a. Chhawng thumna chu multipurpose hall atana duan a ni. He hall sakna tur project hi ni 17.12.2018 ah sorkar in a pawmpui tawh hnu ah hun eng emaw chen hma lak chhunzawm theih loh hnu in kumin June thla khan tender tih chhuah a ni a. JT Power, Chanmari in a building sak hna hi an thawk dawn a ni.

Hall lungphum phumna puala inkhawm ah Pu Tawnluia chuan thu sawiin Zonuam Multipurpose Recreational & Community Hall building sak hna tan theih a lo ni ta chu lawmawm a tih thu tarlangin he project atana thahnem ngai taka hma latu khawtlang hruaitute, a hmunhma phal taka hmantirtu Education department te, veng chhunga mi pawimawh te leh bialtu MLA te, Planning department leh UD&PA lam te nena tanrualna vang a ni, a ti a. Vantlang in kawng hrang hranga an chhawr tangkai tlan theih tur leh hmasawnna rotling, Multipurpose hall chu veng chhung mipuite chauh ni lovin veng dang te pawhin an rawn chhawr tangkai theih ngei a beisei thu sawiin a building satu tur contractor te chu an hna uluk tur leh an hnathawh te pawh ngun taka lo vilpui turin Zonuam khawtlang hruaitu te chu a ngen a ni. 

UD&PA department hmalakna chungchang sawiin Pu Tawnluia chuan Kum 2006 ah Chief Minister Pu Zoramthanga hovin khawpui hmasawnna enkawl bik turin UD&PA department chu din a ni a ti a. Kum 14 chauhva upa UD&PA department chu a din tirh atangin hnathawktu tlem te chauh nei chungin tunah chuan hmalakna ngah ber department zingah a tel pha a ni, a ti a.  Mizoram ah khawpui(identified) 23 a awm a  Heng khawpuite tih hmasawn hna hi UD&PA department chuan enkawlin chu chuan faina lam te, tui in tur te, lirthei vanga khawpui tawt tih thawlna tur te, kea kalte himna tur te thlengin a huam a. Khawpui chhunga lirthei dahna hmun tam zawk buatsaih nan PAHOSS scheme chu kalpui mek a niin heta tan hian vaibelchhe 60 chuang dah a ni a, mimal hmunhma nei tha te hnenah parking siamna turin a thlawna  tanpuina sum pek an ni mek tih a sawi. UD&PA department enkawlna hnuaiah hian Central scheme hrang hrang te pawh a awm thu tarlangin Pu Tawnluia chuan khawpui area huam chhunga retheihna umbo turin nasa takin hma lak a ni, a ti a. 

Pu Tawnluia chuan Aizawl West I MLA bial huam chhung hmasawnna atana hmalakna dangte pawh tarlangin Ramrikawnah Music City siamna tura ruahmanna te, Smart City hnuaia Tuivamit Playground siam tura hma lak mek te, Zonuam YMA Hall sakna tura nuai 20 dah te chu a sawi a. Covid vangin Mizoram chauh ni lo, khawvel pumah hmasawnna hna in a tuar a. Hripui avangin mihring nunna leh dam khawchhuahna tur chu dah pawimawh hmasak loh theih a nih loh avangin Mizoram sawrkarin duh anga hmasawnna hna dang te a thawk chak thei lo chu pawi a tiin mipui pawhin an hriatthiam a beisei tih a sawi.

Inkhawm hi Dr.C.Vanlalramsanga, Commissioner & Secretary UD&PA in a kaihruai a. Pu C.Malsawma, Executive Engineer UD&PA in technical report pe in Pu Zohmingliana Vice President Zonuam Br.YMA in khawtlang aiawhin thu a sawi a. Pu H.Lianzela, Director UD&PA  in lawmthu sawiin hun hnung a khar a ni.