April ni 22 hi ‘Earth Day’ atan kumtin khawvel pumah kum 1970 atang khan hman a ni thin a. Mizoramah pawh kum 1990 atang khan  hman tan a ni. Mipuite hnenah kan chenna lei (Earth) leh min hualveltu humhalh a pawimawhzia zirtirna’n hman thin a ni. Earth Day-ah hian khawvel hmun hrang hrangah mite pungkhawmin, leilung tibawlhhlawhtu thenfai te, kan chenna lei leh boruak tichhe thei ven te, ramkang ven te leh kan chenna khawvel tibawlhhlawhtu tihtlem kawnga hma kan sawn theihna tura inzirtirna te neih thin a ni.

Mi tamtak chuan he Earth Day hi engvanga hmang thin nge a ni tih pawh kan ngaihtuah thiam kher awm love. He kan awmna lei hi boruak inthuah chi hrang hrangin a tuam chhuak vek a, kan chenna hnaih bertu lei deptu chu Biosphere tiin vuah a ni a. Biosphere chhungah chauh hian mihringte leh Pathian thilsiam thil nung dangte hi nunna neiin kan awm thei a ni. Kan awmna lei hi zau viauin lang mahse hmun thuma a then a hmun hnih (2/3) lai a zau hi tuiin a khuh a, thlaler hmun leh vur ram, mihringte chenna tlak loh hmun zau tak hmuntinah a awm bawk tih kan hria ang. Khawi hmun pawh nise he kan awmna leiah hian thilsiam zawng zawngte hi inngeih tlang taka awm tur leh mamawh tinreng inphuhruk tawn tura duan kan ni.

He Earth Day kan hman tulna chhan ber chu he leia Pathian thilsiamte leh mihring te inbuktawka kan khawsakna tura siamtha theitu chu keimahni mihringte ngei hi kan ni tih kan hriatchhuah thar lehna tur leh chumi kawnga ke kan pen hi a ni.

Mizo mipuite hian kan chenna leilung leh a hausakna humhalh kawngah zirtur kan la ngah hle. Kan chakkhai tinreng min petu kan ramngaw leh a chhunga cheng nungcha humhalh kawngah te, bawlhhlawh sawngbawl dan te leh Lui tui kan enkawl dan chungchangah te hian nasa taka tan kan lak thar a tul a ni. Vawiin ni 22 Earth Day kan lo thlen hian kan chenna leilung enkawl turin mawhphurhna leh thawh ve theih kan nei theuh a. Ramngaw leh ramsa humhalh hna thawktu Department leh pawlho tawiawm te, boruak leh leilung tibawlhhlawh thei hrang hrang dona kawnga sorkar tanpui te hi he ram khua leh tui kan nihna anga kan mawhphurhna a ni tih i hrethar leh theuh ang u.

Mizoram bikah hian kan ramngaw hausakna leh leilung tichhetu chimawm tak, nungchate boralna thlen thintu chu ramkang hi a ni tih kan hre awm e. Kan ram-a kan eizawnna pui ber kan Lo neih danin a zir loh vang te, kan fimkhur tawk loh vangte in kumtin nasa takin kan ram kan tikang thin a ni. Hei hian kan ram a tihmelhema a chhunga cheng zofate min timualpho thin a ni. Kuminah hian kum kalta lama mau tam avang leh khua a ro zual em avangin ram kan tikang nasa zual hle a, a pawi em em a ni. Ramkangin kan ram a tihchhiat dan hi chhut thiam harsa khawp a ni. Earth Day kan hman mekah hian ram tikang tawhlo tur leh ramkang a lo chhuah pawha thelh turin i intiam thar leh ang u.
He ni denchhen hian Aizawl bikah chuan E&F Deptt. bul tumin Aizawl khawpui chhunga veng hrang hrang sawmpanga (15) ah tlawmngai pawl - YMA, MUP, MHIP leh Sikul zirlaite nen tangkawpia tuikhur hiahfai te, luikawr thenfai te, khawlai leh kawngdung thenfai leh mipui punkhawmna hmun hrang hrang thianfaia hnatlang neih turn a ni. Tin, Earth Day puala PCCF, Pu S.S. Garbyal-a thuchah chu puanchhuah tura tih a ni bawk. Aizawl hmun remchang laiah Banner-te tar-a, kawng dung leh veng thenkhatah poster tar tum a ni bawk.