1873/2026-2027

Dated Serchhip, the 20^th August 2026: East Lungdar Village Council-a General Seat ruak pakhat hnawhkhat turin vawiin hian Vote thlak niin, zanin-ah Vote tlate hi chhiar nghal a ni ang.

East Lungdar Village Council-a Member pakhat, VC President nilai a boral tak avanga a Seat ruak hnawhkhat tur hian vawiin hian by-election neih a ni a, tukin dar 7:00 atang hian mipui ten vote an thlak tan a, boruak muanawm tak hnuaia inthlanna neih a nih theih nan venhimna pawh uluk taka ruahman niin vote nei ten zalen taka vote an thlak theih nan sawrkar chuan vawiin hi East Lungdar VC huamchhunga awm te tan sawrkar Pisa chawlh ah a puang a ni.

East Lungdar-a Thangburha Hall-ah Polling Station siamin, Polling Booth pathum siam a ni a, tlai dar 5:00-a Vote thlak zawhfel a nih hnu zan dar 7:00-ah vote tlate hi chhiar nghal tura ruahman a ni a; vote chhiarna atan hian dawhkan panga (5) siamin Round 4-ah vote hi chhiar zawh hman tura beisei niin, zanin hian result hriat nghal theih beisei a ni.

East Lungdar VC by-election atan hian Candidate pahnih awmin ZPM atangin Pu F. Lalchawimawia leh Indian National Congress (INC) atangin Pu Vansangliana te an ni a. East Lungdar VC-ah hian in 624 awmin Vote nei mipa 1112 leh hmeichhia 1248, an vaiin 2360 an awm a. Tun dinhmunah Seat 7 awmah Member 6 awm mekin ZPM in Member 3 an nei mek a, MNF in Member 2 leh INC in Member 1 an nei mek a ni.