1875/2026-2027

Saitual, the 20th August, 2026: Vawiin khan Gospel Centenary Hall, Saitualah District Project Office, Samagra Shiksha, Saitual District buatsaih District Secondary Quiz Competition 2025-26 chu neih a ni a, Pu Laldingliana DEO & DPC chu khuallian niin hun a hmanpui.

He hunah hian khuallian Pu Laldingliana DEO & DPC chuan thu a sawi a, intihsiakna hi naupangte leh zirtirtute thawhrimna avanga hlawhtling thei a nih thu a sawi. Pu Laldingliana chuan chuan zirnain a tum ber chu mihringte hmasawn thei tura chher a ni, tih a sawi a, tunlai khawvel inelna sang tawh takah zirlaite chu huaisenna nei a midangte el phak ve tura chahin, hlawhtlinna atana pawimawh ber chu Pathian ṭih a ni, tih a sawi bawk. He Quiz competition hi an hmasawnna kawngah hmanraw tangkai tak a nih theih nan zirlaite chu a duhsakna a hlan a, Saitual district chu zirnaa tan la thar leh turin a fuih bawk a ni.

Pi Mary Malsawmkimi, DMC, DHEW pawhin thu sawiin Mission Shakti hnuaia naupang enkawl dan, a bik takin hmeichhe naupang humhimna leh an hlawhtlin theihna atana dan leh scheme hrang hrang awmte chu kalkhawmte a hrilfiah a ni.

Vawiin Quiz Competition hawnna inkhawm hi Pu Lalhmangaiha Dy. DPC chuan a kai hruai a, Pu V. Lalruatfela chuan hunserh a hmang a, khuallian Pu Laldingliana DEO & DPC bakah Pi Mary Malsawmkimi, DMC, DHEW leh Pi F. Zodingpuii, DIPRO ten thu an sawi a ni. Pi Rebeck K. Lalnunhlimi chu Quiz Master a niin, school 9 te an inel.

District Secondary Quiz Competition neih zawh taka lawmman dawngtute chu:

1st Prize: Govt. High School, Saitual
2nd Prize: Govt. Higher Secondary School, Saitual
3rd Prize: Presbyterian English School, Saitual

Lawmman la ten Certificate leh pawisa fai an dawng a, consolation prize hi school tel zawng zawngten an dawng bawk a ni.