2137/2023-2024

Champhai the 3^rd October, 2023 - Vawiin khan East Tuipui Bialtu MLA Pu Ramthanmawia,Vice Chairman Mizoram Bamboo Link Road Board chuan a bial huam chhung khua Farkawnah Building pathum Social Welfare Department hnuaia sak Travelers Inn, Lianchia Run tih bawk leh Damdawiin Annexe Building thar a hawn bakah SASCI sum cheng nuai 50 senga sak  Joint YMA Hall a hawng a,Hall hawn tharah hian vantlang inkhawm buatsaih nghal a ni.

Pu Ramthanmawia chuan thu sawiin a bial chhungah hmasawnna hna thawh hrang hrang a awm chu lawmawm a tih thu a sawi a. A ruala building thar pathum  hawn a ni chu hmasawnna ropui tak a ni a, ṭangkai tak leh dimdawi taka  hmang turin kalkhawmte  a chah a ni.

MLA chuan a bial chhungah MLA Fund ṭangkai taka hman a nih thu sawiin,in sak sak pawh chhungkaw 46 an awm tawh tih a sawi a,kan vanneih rualin kan bialah lirnghing avanga harsatna kan tawh bakah Myanmar ramchhung buaina avangin raltlan kan lo dawngsawng leh a.Chu bakah vawk pul hri avangin chhungkaw tam takin harsatna kan tawk hi a pawi ka ti hle a,chungte avangin chuan MLA fund hi ṭangkai takin kan hmang ṭhin a ni a ti bawk.

Zirna chungchang sawiin Pu Ramthamawia chuan a bial chhung ah HSLC&HSSLC  2022-2023 Exam result chhuakah zirlai tiṭha zualte Laptop pek an ni a ti a. A bik takin silpoulin hnuaia lehkha zir Farkawna  raltlan naupang panga laiin HSLC Examah Distinction ah an pass thei chu lawmawm a tih thu a sawi a,bial chhung zirlai dangte tan an  entawntlak hle a ni a ti.

Vawiina hawn tak Damdawiin Annexe Building hi Social Welfare and Tribal Affairs Department hnuaia cheng nuai 200 senga sak niin kumin July thlaa thawh ṭan a ni a, September khan zawh fel a ni.Travellers Inn,Lianchia Run tih bawk hi cheng nuai 100 seng a sak niin,kumin July thla veka sak ṭan a ni a, August thla khan zawh fel a ni bawk.Jt YMA Hall hi SASCI hnuaiah cheng nuai 50 senga sak niin kumin March thla aṭanga sak a ni a, September thla khan zawh a ni bawk.

Vawiin hun hmannaah hian Er.F.Lalzova chuan Hall sak dan technical report a pe a. Pi Lalmuanpuii Chhangte Field Facilitator pawhin Damdawiin building leh Travellers Inn sak dan report a pe bawk a,Farkawn VCP Pu C.Lalramliana'n thu a sawi bakah zai thiam hrang hrang zai ngaihthlak niin tlai lamah  ruai an kilho nghal a ni.