1580/2022-2023
Aizawl 12th August 2022: India ram kum 75 zet zalenna kan awm lawmna ropui tak India ram puma hman a nih mek denchhenin Eat Right Mela-Aizawl chu August 12-13, 2022 chhungin Food & Drug Administration (H&FW). Confederation of Indian Industry leh Young Indians tang kawp buatsaihin ropui leh hlimawm taka hman a ni.

August 12, 2022 (Zirtawpni) zing dar 6:00 ah Eat Right Walkathon, Vanapa Hall kawt atanga M IN ECO Outdoor GYM thleng neih a ni a. Hetah hian thalai rual thahnem tak an tel a ni. Walkathon hi Dr. Z.R Thiamsanga, ML A & Vice Chairman, Health & Family Welfare Board-in a vai liam a, kawng zawhtute hian ei leh in thianghlim pawimawhna leh ei leh in thalo laka fimkhurna tur thute an aupui a ni.

Mela hawnna inkhawm hi August 12, 2022 chawhma dar 11:00-ah Millenium Centre Exhibition Hall-ah neih a ni a. Pi Esther Lalruatkimi, IRS, Principal Secretary cum Commissioner of Food Safety, Mizoramin khuallian niin a hmanpui a. Food Business Operator (FBO) sawm bikte leh department officer engemaw zat an tel bawk. Hawnna inkhawmah hian ei leh in chungchang thusawi ngaihnawm tak tak mithiamte hnen atangin ngaihthlak a ni a. Panel Discussion-in zuiin, Eat Right Mela thupui hrang hrang - Eat Seasonal, Eat Local, Eat Safe leh Eat Sustainable tih hmangin helama mithiam thlan chhuahten hun an hmang a ni.

School naupang Pawl 3 - 8 tan Painting Competition leh Pawl 9-10 tan Slogan Competition buatsaih a ni a. Mizo chawhmeh Bai leh Bawl chi hrang hrang (Veg & Non-Veg Bai, Veg & Non-Veg Bawl) insiam siakna Cooking Competition buatsaih a ni bawk. Tin, heng bakah hian ei siam thiam tak takte siam Mizo, Nepali, Burmese leh North Indian chaw leh a hmeh chi hrang hrang ei theiha chhawpchhuah a ni bawk a, heng ruahmanna hrang hrangte hi a telten an hlut hle a ni.

Kan ramah Ei leh In chungchang inzirtirna Kutpui (Eat Right Mela) neih a ni hi a hunin a pawimawh hle a. A lohva kan awm theih hauh loh thil a nih avang leh, ei leh inin mihring hriselna a chhe lam emaw a tha lam emawah nghawng a neih nasat theihzia hriaa India rama ei leh in lam thuneitu sang Food Safety & Standards Authority of India (FSSAI)-in ram puma hma a la hi a lawmawm takzet a ni.

Eat Right Mela hmanin a tum bulpui ber chu mipui mimirte hnena ei leh in tha, him leh thianghlim pawimawhna hriattir a ni a. Kan thil ei thinah taksa tana harsatna leh bawrhsawmna thlen thei thil a awm em tih ngaihtuahna leh hriatna nei lovin a mi nawlpui chuan kan hmuh ang ang kan eiin kan in mai thin a. Taksaa harsatna a lan chhuah hnuah chauh ei leh man ngaihtuahna kan seng ta thin a, a tlai hret tawh thin a ni, Hetiang a nih avang hian ei leh in chungchang inzirtir hi a pawimawh a, harsatna nei mek tan hlei hlei a pawimawh zual a ni.

Eat Right Mela-in a tum dang leh chu ei leh in siamtu leh zuara sumdawng (FBO)-te fimkhur zual theihna tur a ni bawk. An kutah mipuite hriselna thuk taka a innghah avangin an thil siam leh enkawl danah an fimkhur hle a ngai a ni.