1579/2022-2023
Aizawl 12th August 2022: Dr R. Lalthangliana, Health & Family Welfare, Commerce & Industries leh Higher & Technical Education changtu Minister chuan a department hmalakna leh hmachhawp thil pawimawh chi hrang hrang sawrkar laipuia bawhzui turin nimin khan New Delhi-a thleng a, nimin leh vawiin khan sawrkar laipui a dawr.

Dr R. Lalthangliana hian nimin tlai khan Ministry of Micro, Small & Medium Enterprises (MSMEs) dawrin MSMEs Secretary Pu B.B. Swain-a leh official pawimawhte a hmu a, Mizorama Industry hrang hrangte tihchangtlunna tur thil te sawipuiin, Luangmual (Aizawl), Lunglei, Champhai, Kolasib leh hmun hrang hranga factory complex dinna tura department-in Project an thehluhte a sawipui a, anni hian lo tihhlawhtlin ngei an tum thu leh thla hnih hnu velah Union Minister pawhin Mizoram rawn tlawha zin a tum thu an lo hrilh a ni.

Health Minister hian vawiin chawhma lam khan Ministry of Ayush-a Joint Secretary D. Senthil Pandiyan leh official dangte kawmin Ayush Directorate hnuaia thawktu hrang hrangte hlawh chungchang leh State sawrkarin harsatna a tawhte a sawipui a. Joint Secretary hian Mizoram chhung hmun hrang hrangah Ayush dispensary 30 min pek tur thu a lo hrilh a, district hrang hranga Ayush hospital dinna tura hma lak mek a nih dan te lo hrilh bawkin, dispensary dinna atan hian ruahmannate la siam tur a nih thu sawi a ni.

Dr. Thangtea hian Union Health Secretary Dr. Rajesh Bhushan a office ah hmu lehin, Health department hmalakna chi hrang hrangte an sawidun a. Minister hian Zoram Medical College (ZMC) tihhmasawnna tur chi hrang hrang atana DPR thehluh tawh chungchangte a sawi a, Union Health Secretary hian a lo ngaihtuah zui tur thu a lo hrilh. National Health Mission hnuaia hmalakna chi hrang hrangte tarlangin supplementary budget atangin additional allocation dil leh chungchangte sawi a ni a, Pu Bhusan hian theihtawp chhuaha Ministerin harsatna a thlen te sutkian pui a tum thu a lo hrilh. Minister hian RIPANS Zemabawk upgradation atan chak zawka hma lak a tul thu sawiin civil works lamah pawh chak hna kalpui turin a thlen a, Union Health Secretary hian a lo ngaih pawimawh tur thu a lo hrilh.

Hemi hnu hian Minister hian NITI Aayog member, Health changtu Dr. VK Paul hmu lehin a hmalakna avanga Boeing Company in kan mamawh tak tak equipment Health Department min pek avanga lawmthu sawiin, hospital hrang hranga hman tur X-ray khawl ngaihtuahpui turin a thlen a, Dr. VK Paul hian puih a inhuam thu a lo sawi a. Minister hian ZMC tihchangtlun nana one –time assistance awm thei te ngaihtuahsak tura a ngenna pawh ngaihtuahna a lo sen tur thu a lo hrilh a ni.

Minister hian Takeo Konishi-san, Country Director leh Nilaya Mitash, Principal Operations Coordination Specialist, Asian Development Bank te an office-ah a tlawh leh a. Mizoram sawrkar Finance Department-in Healthcare scheme atan sum a puk tur atan chak zawka hma lak dan tur te a sawipui a, anni hian an lo dawngsawng tha hle.

Hemi hnu hian Ministry of Mining-a Secretary Alok Tandon kawm lehin National Green Tribunal order avanga mining lama hmalaka tur atana environmental clearance a ngaih tak thu leh chumi atana NABET Consultant rawih na tur sum ngaihtuahsak turin a thlen a, Mining Secretary hian an lo ngaih pawimawh tur thu leh a theih an lo enzui tur thu a lo sawi.

Vawiin vek khan Ministry of Home Affairs (Border management)-a Joint Secretary Sunil Kumar Barnwal chu a office-ah hmu lehin Bangladesh leh Myanmar ram tena ramria insumdawn tawnna tur atana hmalakna tur pawimawhte a sawipui a. Land Port Authority of India (LPAI) ten MHA a DPR an lo thehluh tawh Cabinet-a ngaihtuah tura chhawpchhuak rang turin a thlen a, border haat din chungchangte, Tuipui ‘D’ Darzo kaia lei dawhna atana land acquisition tihfel te leh hmalak zel dan tur te a thlen bawk.

Dr R. Lalthangliana’n sawrkar laipui a dawrnaah hian Pu Alexander V Chongthu, Addl. Resident Commissioner, Mizoram House, New Delhi leh Dr. Hmingthankimi, OSD, H&FW, Mizoram House ten an tawiawm a ni.