1464/2022-2023

Aizawl, 4th August, 2022: ECHO India leh National Health Mission (NHM) Mizoram tangdunin Floria Hotel, Zarkawta ni hnih awh tur health official-te tana ‘Immersion Training’ an buatsaih chu vawiin khan Health & family Welfare Minister Dr R. Lalthangliana’n khuallian niin a hawng.

Training hawn puala inkhawm buatsaihah Health Minister Dr R. Lalthangliana chuan mipuite, a bik takin mi harsa leh dinhmun hniam zawka awmte hnena hriselna endik leh enkawl hna thawha, hriselna tha tak nena an awm theihna tura hmalak hi Health department mawhphurhna lian tak leh pawimawh ber a nih thu sawiin, hemi ti hlawhtling tur hian Health department hnuaia thawkte thiamna tuaihriam leh an inrintawkna tihngheh a, an hnathawhna kawnga harsatna awm thei te hneh taka hmachhawn thei tura inbuatsaih hi a pawimawh hle a ni, a ti a. Technology lamah thiamna a sangin hmasawnna a thang chak em em a, a bik takin internet hmang tangkaia damlo enkawl leh mipuite tana rawngbawl hi a pawimawh lehzual ta hle tih COVID-19 hripui leng kan hmachhawnnaah khan a chiang hle a ni, a ti a. ECHO, India in hemi kawnga health department a thawkte ziritrna an buatsaih hi a lawmawm takzet a, tun hma pawhin MCON, ZMC leh RIPANS te tan online hmangin training te an lo buatsaih thin a, vawiina Mizoram ngei rawn thlenga hma an rawn la hi an fakawm takzet a ni, a ti bawk.

Dr. Eric Zomawia, Managing Director, NHM Mizoram pawhin technology hmasawn zel umpha chung leh hmang tangkai chunga Mizorama hriselna tihhmasawn leh hmalakna tihchangtlun hi a pawimawh takzet a,  kan zavai hian intuaihriam kan mamawh a, ECHO Model hmanga hetih kawnga hmalak hi a awlsamin a tangkai takzet a, hmasawnna tam tak he training programme kaltlang hian kan hmuh ngei ka ring a ni, a ti.

Dr Sandeep Bhalla, Associate Vice president of ECHO India pawhin NHM Mizoram nena an thawkho thei chu lawmawm a tih thu a sawi a, State TB Center (STC) leh Mizoram Nursing Council te nen pawh an thawhho mek thu sawiin hei hian an hmalakna zau zia leh pawimawhzia a tarlang a ni a ti a. Vaccination Confidence and Advocacy Program (VCAP) an neih sa kaltlangin Mizorama healthcare frontline worker 300 hnenah COVID-19 do kawnga hriat tur leh hmalak dan tur zirtirna an lo pek tawh thu a sawi bawk a ni.

ECHO model hian healthcare professionals - doctor, nurse, ASHA leh Community Health Worker-ten mipuite, a bik takin mi harsa leh dinhmun hniam zawka awmte hnena hriselna endik leh enkawl hna thawh awmze nei leh felfai zawka an kalpui theihnan ‘case-based’ zirna a kalpui a, he an ruahmanna hi COVID-19 hripui len nasat lai bakah Tuberculosis, Cancer vei zawnchhuah leh mental health chungchangah pawh hlawhtling takin an lo kalpui tawh a ni. Kum 2019 khan Ministry of Health and Family Welfare (MoHFW), Government of India nen MoU ziakin national healthcare programme engemawzatin he model hi an chhawr tangkai mek bawk a ni.