889/2026-2027 

Dated Aizawl, the 8th June, 2026: Vawiin chawhnu khan Election Commission of India(ECI)-a Secretary Pu Binod Kumar leh Director Pi Shubhra Saxena te chu ni hnih chhung cham turin Mizoram an lo thleng a; Planning & Programme Implementation Department Conference Hall-ah Aizawl district-a election official-te nen Mizoram-a Special Intensive Revision(SIR) of Electoral Roll kalpui mek hlawhtlinna tura an hmalak dan thlirletna leh hmalak zel dan turte sawihona hun an hmang.

Pi Shubhra Saxena chuan kalkhawmte hnenah SIR awmzia leh a kalphung chungchangte a sawifiah a. Pi Shubhra chuan SIR hi hna hautak leh fimkhur taka kalpui ngai a nih avangin, India Constitution-in a sawi ang leh Representation of the People Act, 1950-in a ruat angte chu ngun taka zawm turin kalkhawmte chu a ngen a; hei hi vote nei thei zawng zawng te electoral roll-a telh vek an nih theih nan leh vote nei thei lote chu paihchhuah an nih theih nan a pawimawh thu a sawi a ni. Hemi bakah hian Pi Shubhra chuan Mizoram hi ramri zau tak nei state a nih avangin, dan lo a lo lut (illegal migrants) leh dik lo taka thil tih (fraudulent practices) laka venhimna atan official-te chu fimkhur zawka hma la nasa lehzual turin a fuih bawk a ni.

He hunah Mizoram Chief Electoral Officer(CEO) Pi Garima Gupta pawhin thu sawiin official-te chu thawhhona tha leh inpumkhatna neiin, a tulna apianga che chhuak tur leh BLO-te puih an ngaihna zawna pui zel turin a chah a. Mizoram-a SIR hna kalpui mek chu hlawhtling taka zawh a nih theih nan official-te chu duhsakna a hlan nghal a ni.

Vawiin thutkhawm hi Pi Shubhra Saxena in a kaihruai a. Mizoram CEO, Aizawl District DEO Bawrhsap ni bawk Er. Lalhriatpuia, ERO, AERO, BLO te bakah election official dangte an tel a ni.