888/2026-2027

Dated Aizawl, the 8th June,2026: Vawiin khan State Level Orientation on Viksit Bharat: Guarantee for Rozgar and Ajeevika Mission (Gramin) [VB:G RAM G] chu Conference Hall, Lianchhiari Runah neih a ni a. He hunah hian Prof Lalnilawma, Minister of State for Rural Development and Administration Department chu khuallian a ni.

Rural Development Minister Pu Lalnilawma chuan VB:G RAM G chu mipuiten hlawk taka an chhawr ngei a duh tih a sawi a. He huna tel Official-te leh kalkhawmte chu an hna tha tak leh fel fai taka thawk zel turin a chah a ni. 

Inrelbawlna langtlang leh hmasawnna hi sawrkarin a ngai pawimawh tih sawiin, chanchinbumi lo tel te chu RD&A Dept. hmalakna hrang hrangte a hmuna enpui turin a sawm nghal bawk a ni.

 Kum-2 chhungin Ministry of Rural Development-in ni-100 daih inhlawhna ‘Labour Budget’ chu an pawm tawh thusawiin, tunkum ah chuan ‘Normative Allocation’ hmanga pawisa hi pek tur a nih avangin Labour Budget approach-in a kal lo thung tih a sawi bawk.

VB:G RAM G thiltum pawimawh tak chu India ram pum huapa hmasawnna ngelnghet neih a ni a ti a. Viksit Bharat@2047 atana mitin te leh Department hrang hrangte inpuahchah nasat a ngaih thu a sawi a ni. Thingtlang khawtin te pawh mahnia intodelh tura theihtawp chhuahin ke pen zel a pawimawh takzet a. He hmalakna kawng atana pawimawh tak chu hnathawh inthlunzawmna (convergence) niin, department hrang hrang atanga hnathawhte chu convergence-nen tha taka kalpui a nih theih ngei a beisei thu a sawi a ni. VB:G RAM G atana State Matching Share pawh Finance Department-ah dil mek a nih thu a sawi bawk.

Minister chuan MGNREGA an lo kalpui thin danah duhthusam a ni em tih te, thingtlang mite MGNREGA Scheme kaltlang hian chhawmdawl tha tawk an ni em tih te ngaihtuah let a ngaih thu a sawi a. Thlenchin atanga hmasawn zel a tul tih a sawi bawk. VB:G RAM G-in a ngaih pawimawh Water Security chungchangah pawh Department hrang hrangten nasa zawka an thawhho a pawimawh thu a sawi a ni.

VB:G RAM G hi kumin July ni-1, 2026 atangin India ram pumah hman tan tur niin, chumi atana inbuatsaihna kal zelah State Level atanga Village Level thleng Orientation leh Public Outreach (Jan Samvaad) neih mek zel a ni. Mizoram-ah pawh inbuatsaihna nasa taka kalpui niin, the Mizoram VB:G RAM G Scheme, 2026 chu Council of Ministers-in a pawm hnuah, chhuah a ni a. India rama VB:G RAM G Scheme kalpui dan tur chhuah hmasaber state a ni. VB:G RAM G hnuaia ni-60 chhung chawlhna (seasonal pause) chungchang pawh Mizoram chuan ruahmanna leh hmalakdan tur a lo duang tawh bawk. Seasonal Pause chhung hian VB:G RAM G-a hna reng reng thawh phal a ni lo a, thingtlang miten buhtuh leh buhseng laia anmahni leh midang hnena an inhlawh theihna tura seasonal pause hi duan a ni.

State Orientation hi Pu V.Lalengmawia, Additional Secretary, Rural Development and Administration Department-in a kaihruai a. MGNREGA leh VB:G RAM G chungchang PowerPoint presentation hmanga zirhona leh sawihona neih a ni bawk. 

He hunah hian Sawrkar Dept. aiawhte bakah All Mizoram VC Association hruaitute leh Mizoram Journalists Association-te an tel a ni.